برازيليانىڭ بۇرىنعى پرەزيدەنتى جاير بولسونارۋ قاماۋعا الىندى، دەپ حابارلايدى "ادىرنا" ۇلتتىق پورتالى Globo باسىلىمىنا سىلتەپ.
مالىمەتكە سايكەس، بولسونارۋ سەنبى كۇنى فەدەرالدىق پوليتسيانىڭ سۇراۋى بويىنشا سوت وردەرىن ورىنداۋ اياسىندا تۇتقىندالعان. ول 4 تامىزدان بەرى ۇيقاماقتا بولعان.
قۇقىق قورعاۋ ورگاندارىنىڭ ايتۋىنشا، بۇل شارا ەكس-پرەزيدەنتتىڭ ۇلى، سەناتور فلاۆيو بولسونارۋ جۇما كۇنى اكەسىن قولداۋعا ارنالعان اكتسيا وتكىزۋگە شاقىرعاننان كەيىن قابىلدانعان.
ەسكە سالا كەتسەك، برازيليانىڭ جوعارعى سوتى بيىل قىركۇيەك ايىنىڭ باسىندا 70 جاستاعى جاير بولسونارۋدى مەملەكەتتىك توڭكەرىس جاساۋعا باعىتتالعان قاستاندىق ۇيىمداستىرعانى ءۇشىن كىنالى دەپ تانىپ، 27 جىل 3 ايعا باس بوستاندىعىنان ايىرۋعا ۇكىم شىعارعان. بۇل – ەل تاريحىندا بۇرىنعى پرەزيدەنتتىڭ دەموكراتياعا قارسى قىلمىس جاساعانى ءۇشىن سوتتالۋى بويىنشا العاشقى وقيعا.
