بۇل تۋرالى اقپارات جانە قوعامدىق دامۋ ءمينيسترى دارحان قىدىرالى زەرەندىدە وتكەن رەسپۋبليكالىق جاستار اكادەمياسىندا ايتتى. ءمينيستردىڭ سوزىنشە، بۇل جۇمىستى جۇيەلەۋگە جانە جاستار رەسۋرستىق ورتالىقتارى قىزمەتكەرلەرىن ىرىكتەۋدىڭ ناقتى ولشەمدەرىن انىقتاۋعا مۇمكىندىك بەرەدى.
اقمولا وبلىسىنىڭ زەرەندى اۋدانىندا اقپارات جانە قوعامدىق دامۋ ءمينيسترىنىڭ ۇيىمداستىرۋىمەن “ادىلەتتى قازاقستان - ادال ازامات” جاستار اكادەمياسى ءوتىپ جاتىر.
اتالعان ءىس-شاراعا قازاقستاننىڭ بارلىق وڭىرىنەن كەلگەن 100-دەن استام جاس ءۇش كۇن ىشىندە ءتۇرلى ترەنينگتەرگە قاتىسىپ، ءوزارا تاجىريبە الماستى. بۇل تۋرالى دارحان قىدىرالى ءوزىنىڭ پاراقشاسىندا جازدى.
ءىس-شارا اياسىندا وتكەن “ادىلەتتى قازاقستان - ادال ازامات” اتتى جيىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ، اقمولا وبلىسى اكىمىنىڭ ءبىرىنشى ورىنباسارى ەلدوس رامازانوۆ، Amanat پارتياسىنىڭ اتقارۋشى حاتشىسى داۋلەت كارىبەك تە ءسوز سويلەپ، جاستارعا پايدالى اقپاراتتار بەردى.
“وزدەرىڭىزگە بەلگىلى، مەملەكەت باسشىسى تۇركىستانداعى ۇلتتىق قۇرىلدايدا جاستارىمىز تۋعان جەردىڭ ەشكىمگە ۇقسامايتىن ەرەكشەلىگى مەن بىرەگەي بولمىسىن جەر جۇزىنە تانىتىپ جۇرگەنىن ەرەكشە اتاپ وتكەنى بەلگىلى. سونىمەن قاتار «جاس ۇرپاق تاريح تاعىلىمىن جانە ەلدىڭ جارقىن بولاشاققا ۇمتىلىسىن ءبىر ارناعا توعىستىرىپ جاتىر. وسى سەرپىلىستىڭ قارقىنىن ساقتاي وتىرىپ، ونى كۇشەيتە ءتۇسۋ – مەملەكەتتىڭ مىندەتى» دەگەن ەدى”، - دەپ جازدى مينيستر.
بيىل «مەملەكەتتىك جاستار ساياساتى تۋرالى» زاڭ ءوز كۇشىنە ەندى. جاستار ساناتى 35 جاسقا دەيىن ۇلعايدى. قازىر ولاردىڭ سانى 6 ملن-عا ءوستى. زاڭدى ىسكە اسىرۋ ءۇشىن، 7 باعىت جانە 80 ءىس-شارالار كەشەنىنە قول جەتكىزۋدى كوزدەيتىن 2029 جىلعا دەيىن ارنالعان مەملەكەتتىك جاستار ساياساتىنىڭ تۇجىرىمداماسى قابىلداندى.
(س) قر اقدم ءباسپاسوز قىزمەتى
"ادىرنا" ۇلتتىق پورتالى
