بۇگىن، كونستيتۋتسيا كۇنىنىڭ قارساڭىندا قوناەۆ قالاسى شەڭگەلدى اۋىلدىق وكرۋگىنە قاراستى قوسقۇدىق اۋىلىندا 100 ورىندىق مەكتەپ قولدانىسقا بەرىلدى.
بۇعان دەيىن وقۋشىلار 1952 جىلى سالىنعان وقۋ وشاعىندا ءبىلىم العان. مەكتەپ "حالىق يگىلىگى" قوعامدىق قورىنىڭ قارجىسىنا سالىنعان. وعان 750 ملن تەڭگە اقشا جۇمسالعان. 767 ادام تۇراتىن بۇل اۋىلدا 86 بالا وقيدى. ال بيىل 1-سىنىپقا 5 وقۋشى قابىلدانباق.
وقىتۋ مەملەكەتتىك تىلدە، ءبىر اۋىسىمدا جۇرگىزىلەدى. مۇندا 24 وقۋ كابينەتى، 2 شەبەرحانا، كومپيۋتەرلىك سىنىپ، 3 ارنايى كابينەت (فيزيكا، حيميا، بيولوگيا), 3 ينتەراكتيۆتى تاقتا، اكت جانە سپورت زالدارى، 60 ورىندىق اسحانا، وقۋ زالى بار كىتاپحانا، مەديتسينالىق كابينەت بار. مەكتەپتە 20 مۇعالىم قىزمەت ەتەدى.
ءبىلىم وشاعىنىڭ اشىلۋ سالتاناتىنا وبلىس اكىمى مارات سۇلتانعازيەۆ ارنايى قاتىسىپ، تۇرعىنداردى قۋانىشتى كۇنمەن قۇتتىقتادى.
"بارشاڭىزدى 2023-2024 وقۋ جىلىنىڭ باستالۋىمەن، مەملەكەتىمىزدىڭ كونستيتۋتسياسى كۇنىمەن جانە جاڭا مەكتەپتىڭ اشىلۋىمەن قۇتتىقتايمىن! بىرەر كۇننەن كەيىن وبلىسىمىزداعى 456 مەكتەپ ەسىگىن ايقارا اشىپ، 330 مىڭنان اسا وقۋشى وقۋ جىلىن باستايدى. ءبىز ءوز تاراپىمىزدان بالالارىمىزدىڭ ءوز زامانداستارىمەن تەڭ دارەجەدە زاماناۋي مەكتەپتەردە ءبىلىم الۋى ءۇشىن بارلىق مۇمكىندىكتەردى قاراستىرۋدامىز", - دەدى مارات سۇلتانعازيەۆ.ءوڭىر باسشىسىنىڭ سوزىنشە، وقۋ ورداسىنىڭ بولۋى - جاس مامانداردى اۋىلعا تارتۋعا سەپتىگىن تيگىزەدى.
"بۇل مەكەننىڭ دامۋ پوتەنتسيالى جوعارى. قاسىندا تەمىرجول ستانساسى بار، وبلىس ورتالىعىنا جاقىن ورنالاسقان. جاڭا مەكتەپ بوي كوتەرگەنىنە تۇرعىندار ءدان ريزا بولعانىن بايقادىق. مەكتەپ - ماڭىزدى ينفراقۇرىلىمدىق نىسان. ونىڭ ارقاسىندا جاس مامانداردى، وتباسىلاردى تارتىپ، اۋىلعا جان بىتىرۋگە بولادى. بۇل - ەلدىمەكەننىڭ دامۋىنا تىڭ سەرپىن بولارى دا انىق", - دەدى وبلىس اكىمى.سونىمەن قاتار ول قوسقۇدىقتا مەكتەپ اشىلۋىنا ۇيىتقى بولعان الدابەرگەن داۋرەن قاناتۇلىنا العىسىن ءبىلدىردى. سالتاناتتى شارادا الماتى وبلىسىنىڭ بۇرىنعى اكىمى، مەملەكەتتىك قوعام قايراتكەرى قانات بوزىمباەۆ تا ءسوز الدى.
"بۇگىن - مەن ءۇشىن، بالا-شاعام ءۇشىن قۋانىشتى كۇن. وسى ۋاقىتقا دەيىن بىرنەشە مەكتەپ سالىنىپ جاتقاندا باسى-قاسىندا ءجۇردىم. ۇلەس قوسىپ جۇرسەم دە، ءدال قازىرگىدەي تولقىعان ەمەسپىن. ويتكەنى، وسى اۋىلدا اكەم الدابەرگەن تۋىپ وسكەن. جاڭا مەكتەپتى ۇلىم داۋرەن سالىپ بەرىپ وتىر. ونىڭ بۇل ءىسى - كوڭىلىمدى كوككە كوتەردى. اۋىلدىق مەكتەپتە بالالار ءبىلىم الىپ، وسەدى دەگەن ۇمىتتەمىز. ولار وسى جەردەن ۇلكەن ومىرگە قادام جاسايدى. بالالارىمىز بولاشاقتا ەلىمىزدىڭ مىقتى ازاماتتارىنىڭ قاتارىندا بولاتىنىنا سەنەمىز", - دەدى قانات بوزىمباەۆ."حالىق يگىلىگى" قوعامدىق قورى مەكتەپ ۇجىمىنا Suzuki ماركالى اۆتوكولىگىن سىيعا تارتتى. بۇدان بولەك، قور كوپبالالى، الەۋمەتتىك وسال توپتان شىققان 12 بالانى مەكتەپكە دايارلاپ، قۇرال-جابدىقتارمەن، مەكتەپ فورماسىمەن قامتاماسىز ەتتى. جالپى الماتى وبلىسىندا بيىل 15 750 ورىندىق 16 مەكتەپتىڭ قۇرىلىسى جۇرگىزىلگەن. ونىڭ 9-ى 1 قىركۇيەكتە اشىلادى. ولار: • المالىباق، ىرگەلى ورتا مەكتەپتەرىنە قوسىمشا 600 ورىندىق جاپسارجايلار; • قوناەۆ قالاسىندا 900 ورىندىق مەكتەپ; • ۇزىناعاش اۋىلى; • كوكقاينار، بورالداي، مەجدۋرەچەنسك اۋىلدارىنا ورتاق مەكتەپ; • قاسكەلەڭ قالاسى; • ەسىك قالاسى.
