"ادىرنا" ۇلتتىق پورتالى "ماڭعىستاۋ وبلىسى اكىمدىگىنىڭ ءىس باسقارماسى" كوممۋنالدىق مەملەكەتتىك مەكەمەسى دارەتحانا قاعازىنا ارناپ 7 024 609 تەڭگە قارجى بولگەنى تۋرالى سىني ماتەريال جاريالاعان ەدى. وبلىس اكىمدىگى اتالعان سىنعا جاۋاپ بەردى، - دەپ حابارلايدى ادىرنا ۇلتتىق پورتالى.
ءتىلشىمىز اتالعان ماتەريالدا اكىمدىكتە قىزمەت ىستەيتىن شەنەۋنىكتەر كۇنىگە 694 ورام، ياعني 104 100 مەترلىك اجەتحانا قاعازىن پايدالاناتىنىن، مۇنداي كوپ قاعازدى پايدالانۋ ءۇشىن مەمقىزمەتكەرلەر كۇنىگە قانشا رەت دارەتحاناعا بارۋى كەرەكتىگىن سۇراعان.
رەسمي جاۋاپتا: "دارەتحانا قاعازدارىن ساتىپ الۋ بويىنشا مەملەكەتتىك ساتىپ الۋدىڭ ۇيىمداستىرۋشىسى «ماڭعىستاۋ وبلىسى اكىمدىگىنىڭ ءىس باسقارماسى» كوممۋنالدىق مەملەكەتتىك مەكەمەسى ء(ارى قاراي-مەكەمە). مەكەمەنىڭ نەگىزگى ماقساتى مەملەكەتتىك مۇلىكتى پايدالانۋ جانە ۇستاۋ، جەرگىلىكتى وكىلدى، اتقارۋشى جانە مەملەكەتتىك ورگاندار ءۇشىن شارۋاشىلىق تاۋارلارمەن ونىڭ ىشىندە دارەتحانا قاعازدارىمەن، تاعىدا باسقا زاتتارمەن جابدىقتاۋ فۋنكتسيالارىن ورىنداۋ بولىپ تابىلادى. جوعارىدا اتالعان عيماراتتاردا ورنالاسقان مەملەكەتتىك مەكەمەلەردى قامتاماسىز ەتۋ ماقساتىندا جىل سايىن دارەتحانا قاعازى جانە باسقا دا زاتتار ساتىپ الىنادى. جوعارىدا اتالعان عيماراتتاردا بارلىعى 1300 قىزمەتكەر ورنالاسقان. سونىمەن قاتار، تەك وبلىستىق جيناۋ پۋنكتىندە جىل سايىن 15 دارىگەر، 80 قىزمەتكەر جانە 1500 اسكەرگە شاقىرىلۋشى كازارمالىق جاعدايدا ورنالاستىرىلادى. سوندىقتان گيگيەنا قۇرالدارىمەن قامتاماسىز ەتۋ ماقساتىندا جىل سايىن كەلۋشىلەرگە، قىزمەتكەرلەر مەن اسكەرگە شاقىرىلۋشىلارعا ىڭعايلى بولۋ ءۇشىن وسىنداي تاۋارلاردى ساتىپ الۋ جۇرگىزىلەدى" دەلىنگەن.
رەسمي جاۋاپتا كورسەتىلگەن 2895 ادام كۇنىنە 694 ورام دارەتحانا قاعازىن پايدالانۋى مۇمكىن بە؟ ەندى ءبىزدى وسى سۇراق مازالاپ وتىر.
"ادىرنا" ۇلتتىق پورتالى