رينگتە ءبىر-ءبىرىن جىعۋعا دايىن ەكى ادامدى كورۋ ماعان قاتتى اۋىر - نۇرتاس ادامباي

قازاقستاندىق اكتەر، ستسەناريست، پروديۋسەر نۇرتاس ادامباي الەۋمەتتىك جەلىدە جەكپە-جەككە قىزىعاتىندارعا قاتىستى ءوز ويىن ءبىلدىردى. ول ۇرىپ-سوعۋ ءتاسىلى بار سپورت تۇرلەرىن مۇسىلمانعا جات دەپ سانايتىنىن دا جاسىرمادى، دەپ حابارلايدى “ادىرنا” ءتىلشىسى. بىرنەشە تانىمال فيلمدەردىڭ اۆتورى، پروديۋسەر نۇرتاس ادامباي ءدىن اياسىندا بىرنەشە تاقىرىپتاردى كەڭىنەن قوزعاپ كەلەدى. ول ءوزىنىڭ Instagram جەلىسىندەگى جەكە پاراقشاسىندا بوكس، mma سىندى بىرقاتار سپورتپەن اينالىساتىنداردى سىناعان. الەۋمەتتىك جەلىدە ادامداردىڭ ءبىر-ءبىرىن ۇرىپ-سوققان ۆيدەولارىن ءجيى بايقايتىنىن ايتقان اكتەر رينگتە ءبىر-ءبىرىن جىعىپ جاتقان سپورتشىلاردى كورۋ “اۋىر” دەيدى. “سوڭعى كەزدەرى ينتەرنەتتەن ادامداردىڭ ءبىرىن-ءبىرى ۇرىپ-سوعاتىن ۆيدەولاردى ءجيى كورەمىن. مەن قازىر بوكس، mma, ufc جانە «جاۋىنگەرلىك سپورت» دەپ اتالاتىن باسقا شوۋلار مەن وقيعالار تۋرالى جازىپ وتىرمىن. حاديستە: «شىنايى مۇسىلمان – ءتىلى مەن قولىنان باسقا ادامدار زارداپ شەكپەيتىن ادام دەلىنگەن. بۇل سوزدەردى مۇسىلمان باۋىرلارىمىز ۇمىتىپ كەتكەنى قالاي؟ مەن بالالارىن وسىلاي ۇرىسقا اپاراتىن ادامداردى تۇسىنبەيمىن. ولارعا نە ۇيرەتەدى؟ اگرەسسيا، زورلىق-زومبىلىق؟”،-دەپ جازادى نۇرتاس ادامباي. سونداي-اق ول مۇنداي ارەكەتتەرگە اقشا، اتاق-داڭق نە وزگە ءۇشىن باراتىنداردى قۇپتامايتىنىن جەتكىزدى. نۇرتاس ادامباي: “«ەل نامىسىن قورعايمىن!» دەگەن سوزگە الدانىپ قالماڭىزدار. بىرىنشىدەن، ەلىمىزگە ەشكىم شابۋىل جاساپ جاتقان جوق، اللاعا شۇكىر. ەكىنشىدەن، ەگەر سىزدە وتانعا پايدا اكەلۋ نيەتىڭىز بولسا، مۇنى رۇقسات ەتىلگەن جولمەن جاساۋدىڭ كوپتەگەن باسقا جولدارى بار”،-دەپ ءسوزىن قورىتىندىلادى.