ءماجىلىستىڭ جالپى وتىرىسىنا دەپۋتات ماقسات تولىقباي قازاقستاندىقتاردىڭ 8 مىڭنان استام ءوتىنىشىن اكەلدى، - دەپ حابارلايدى "ادىرنا" ءتىلشىسى.
ماجىلىسمەن پرەمەر-مينيستر ءاليحان سمايىلوۆقا دەپۋتاتتىق ساۋال جولداپ، الماتى وبلىسىنداعى ساياجاي تۇرعىندارىنىڭ ماسەلەلەرىن ايتتى.
«مەن ساياجايلاردا تۇرىپ جاتقان، بيۋدجەتتەن ءبىر تيىن دا كومەك المايتىن ادامداردىڭ ايانىشتى جاعدايىن ءوز كوزىممەن كوردىم. راسىندا، جاعداي وتە قيىن، حالىقتىڭ شىدامى تاۋسىلىپ بارادى. مەن ءوزىم حالىقپەن كەزدەستىم. وتىنىشتەر كوپ. مەن وزىممەن بىرگە 8 مىڭنان استام حالىقتىڭ حاتىن اكەلدىم. مىنە، وسى وتىنىشتەردىڭ بارلىعى»، — دەدى دەپۋتات ءبىر قوراپ قۇجاتتى كورسەتىپ.
ول وبلىسقا ءوزى بارىپ، قوناەۆ، قاراساي، ەڭبەكشىقازاق، تالعار، جامبىل جانە ىلە اۋداندارىندا 674 ساياجاي بارىن بىلگەنىن ايتتى. ونداعى تۇرعىنداردىڭ سانى 500 مىڭعا تاياپ قالدى. سونىمەن قاتار، جاقىن جەردە قاجەتتى ينفراقۇرىلىم جوق: مەكتەپ، بالاباقشا، قوعامدىق كولىك، مەديتسينالىق قىزمەت كورسەتۋ، اسفالت، پوشتا بولىمشەسى، بايلانىس توراپتارى، الەۋمەتتىك قىزمەتتەر مەن الەۋمەتتىك نىساندار جوقتىڭ قاسى.
«جۇزدەگەن مىڭ قانداستارىمىز ساياجاي القاپتارىنا «سەلو» مارتەبەسىن بەرۋدى سۇراپ جاتىر. ويتكەنى، قولدانىستاعى زاڭناماعا سايكەس، جەرگىلىكتى اتقارۋشى ورگاندار بيۋدجەتتىك قاراجاتتى تەك قالا مەن اۋىلدىق ەلدى مەكەندەردى دامىتۋعا عانا بولە الادى»، - دەدى ماقسات تولىقباي.
قوناەۆتاعى ساياجاي تۇرعىندارى ەلەكتر جەلىلەرىنە قاتىستى قيىندىقتاردان زارداپ شەگۋدە
دەپۋتات بۇل ماسەلە تەك الماتى وبلىسىندا عانا ەمەس، قازاقستاننىڭ باسقا وڭىرلەرىندە دە بار ەكەنىن ايتتى. تولىقبايدىڭ پىكىرىنشە، ۇكىمەت ماسەلەنى شەشۋ ءۇشىن تەز ارادا ارنايى باعدارلاما ازىرلەۋى كەرەك.
