بقو-دا اۋىل جاستارىنىڭ باستاماسىمەن باستاڭعى ۇيىمداستىرۋ - داستۇرگە اينالۋدا. اۋىل جاستاردىڭ باسىن قوسقان باستاڭعى وسى جولى وبلىستىڭ بايتەرەك اۋدانىندا ءوتتى.
بۇعان دەيىن كونە سالت-ءداستۇردى جاڭعىرتۋ ماقساتىنداعى اتاۋلى شارا اقجايىق اۋدانىندا ۇيىمداستىرىلىپ، وزگە اۋدان جاستارى دا قولداپ، ءىرى باستاماعا اينالعان بولاتىن
شاعان وزەنىنىڭ جاعاسىنا كيىز ۇيلەر تىگىلىپ، الاڭقايدىڭ قورشاۋىنا نايزا شانشىلدى. اتالمىش شاراعا 22 اۋىلدان 100-دەن اسا جاستار قاتىستى.
الدىمەن ارۋاقتار رۋحىنا قۇران باعىشتالىپ، قوي باۋىزدالدى. جاستار ول جەردە قوي سويۋدىڭ قىر-سىرىنا قانىعىپ، تاجىريبە الماستى. قىزدار جاعى قۇرت قايناتىپ، باۋىرساق ءپىسىردى. ۇلتتىق ويىن جامبى اتۋدان جارىسقان جاستار اۋدارىسپاقتا بىلەك كۇشىن بايقاستى. ونەرلى ورەندەر كۇي تارتىس جاساپ، ءداستۇرلى انمەن باستاڭعىنىڭ ءباسىن اسىردى. التىباقان تەۋىپ، شەجىرە تارقاتقان اڭگىمە كورىگى قىزدى.
ءىس-شارادا ءتۇرلى سالت-ءداستۇر تۋرالى كەڭىرەك ماعلۇماتتار بەرىلىپ، ارنايى كورىنىس قويىلدى. سونىڭ ىشىندە تەاترلاندىرىلعان قويىلىمدا اۋىلعا سالت اتپەن كەلگەن سال-سەرىلەردى قۇرمەتپەن قارسى العان جاستار «دەڭگەنە»، «سىرگە جيار»، «قاپ قاعار»، «قازان شەگەلەۋ»، «ءبىز شانشار» سىندى سالت-داستۇرلەرىن دارىپتەدى.
ءار كيىز ۇيدە اۋداننىڭ سپورت، كىتاپحانا، تۋريزم، شىرعاماشىلىق ورتالىعى، مادەنيەت جانە ونەر سالاسىندا جۇرگەن جاستار جەتىستىكتەرىمەن ءبولىسىپ، كورمە ۇسىندى.
ادەمى كەشتى تاماشالاعانداردىڭ قاتارىندا بايتەرەك اۋدانىنىڭ اكىمى مارات توعجانوۆ، وبلىسىمىزعا جۇمىس ساپارىمەن كەلگەن قازاقستان جازۋشىلارى وداعىنىڭ توراعاسى مەرەكە قۇلكەنوۆ بولدى.
مەيماندارعا جايىلعان داستارحان باسىندا "تاباق تارتۋ" ءراسىمى جاسالدى.
كۇمبىر كۇي توگىلىپ، اسەم ءان شالقىعان دۋماندا اۋدان جاستارى ءوزارا قاعىتپا قالجىڭ، ادەمى ازىلدەرىمەن ساۋىق كەشىن تۇيىندەدى.
