BQO-da aýyl jastarynyń bastamasymen Bastańǵy uıymdastyrý - dástúrge aınalýda. Aýyl jastardyń basyn qosqan BASTAŃǴY osy joly oblystyń Báıterek aýdanynda ótti.
Buǵan deıin kóne salt-dástúrdi jańǵyrtý maqsatyndaǵy ataýly shara Aqjaıyq aýdanynda uıymdastyrylyp, ózge aýdan jastary da qoldap, iri bastamaǵa aınalǵan bolatyn
Shaǵan ózeniniń jaǵasyna kıiz úıler tigilip, alańqaıdyń qorshaýyna naıza shanshyldy. Atalmysh sharaǵa 22 aýyldan 100-den asa jastar qatysty.
Aldymen arýaqtar rýhyna quran baǵyshtalyp, qoı baýyzdaldy. Jastar ol jerde qoı soıýdyń qyr-syryna qanyǵyp, tájirıbe almasty. Qyzdar jaǵy qurt qaınatyp, baýyrsaq pisirdi. Ulttyq oıyn Jamby atýdan jarysqan jastar aýdaryspaqta bilek kúshin baıqasty. Ónerli órender kúı tartys jasap, dástúrli ánmen bastańǵynyń básin asyrdy. Altybaqan teýip, shejire tarqatqan áńgime kórigi qyzdy.
Is-sharada túrli salt-dástúr týraly keńirek maǵlumattar berilip, arnaıy kórinis qoıyldy. Sonyń ishinde teatrlandyrylǵan qoıylymda aýylǵa salt atpen kelgen sal-serilerdi qurmetpen qarsy alǵan jastar «Deńgene», «Sirge jııar», «Qap qaǵar», «Qazan shegeleý», «Biz shanshar» syndy salt-dástúrlerin dáriptedi.
Ár kıiz úıde aýdannyń sport, kitaphana, týrızm, shyrǵamashylyq ortalyǵy, mádenıet jáne óner salasynda júrgen jastar jetistikterimen bólisip, kórme usyndy.
Ádemi keshti tamashalaǵandardyń qatarynda Báıterek aýdanynyń ákimi Marat Toǵjanov, oblysymyzǵa jumys saparymen kelgen Qazaqstan Jazýshylary odaǵynyń tóraǵasy Mereke Qulkenov boldy.
Meımandarǵa jaıylǵan dastarhan basynda "Tabaq tartý" rásimi jasaldy.
Kúmbir kúı tógilip, ásem án shalqyǵan dýmanda aýdan jastary ózara qaǵytpa qaljyń, ádemi ázilderimen saýyq keshin túıindedi.
