Úlgi tutar tulǵalar kimder bolýy kerek?

9388
Adyrna.kz Telegram
Foto: tvsamara.ru
Foto: tvsamara.ru

Adamzattyń damý tarıhynda uly betburys jasaǵan Apple kompanııasynyń negizin qalaýshy, ónertapqysh Stıv Djobs: «Men barlyq tehnologııamdy tek Sokratpen kezdesý úshin jumsar edim» degen eken.

Ol nege olaı aıtty. 2011 jyly (óler aldynda) 7 mlrd dollar baılyǵy bolǵan álemniń eń baqýatty adamdarynyń biri bul sózderdi jáıdan-jáı aıta salmaǵany anyq. Sebebi Stıv Djobs Sokratty úlgi tutqan. Onyń ilimin boıyna sińirip, ustanymdaryn ózine jol baǵdar etken. «Adam  kóptiń pikirimen, kóptiń sózimen  júrmeýi kerek, shyndyqpen júrý  kerek, ádil ómir súrýi  kerek» degen Sokrattyń sózin ómirlik serigi etken Stıv Djobs qarapaıym adam bolǵan.

Al endi ózimizdiń taqyrypqa qaraı oıyssaq. Joǵarydaǵy mysaldan mynadaı túıin shyǵarýǵa bolady. Sen úlgi tutatyn adamnyń minez-qulqy, aqıqatqa degen kózqarasy, bilim men biligi bári-bári bolashaǵyńa áser etýi múmkin. Stıv Djobs ta Sokratqa eliktep, ony úlgi tutyp jaman boldy dep aıta almaısyz. Qazirgi tańda el jastary kimge eliktep, kimdi tulǵa kórip júr. Búginginiń máselesi osy. Biraq jaǵdaı kóńil kónshitpeıdi. Óıtkeni jelige bir kóz júgirtip ótseńiz jastardyń kimderdiń tárbıesinde ósip jatqanyn birden ańǵarýǵa bolady.

Mıllıondaǵan oqyrmandary bar blogerler men kúmándi dinı ýaǵyzshylardyń dáýreni júrip tur. Zaman nege bulaı boldy dersiz. Oǵan kinálini tabý op-ońaı, bárine ózimiz aıyptymyz. Jas urpaqtyń Alash azamattaryn aýzynan tastamaı aıtyp júretin shaqta, jeńil-jelpilerdiń artynan ileskenin kózimiz kórip júr.

Nege olar kezindegi jáne qazirdegi ǵalymdardy, eńbek adamdaryn, ustazdardy, Alash arystaryn, tarıhı salmaǵy bar tulǵalardy úlgi kórmeıdi. Mine, álsiz tusymyz da osy shyǵar. Al endi jáımendep máseleniń túp-tórkini nede, boı suǵyp kórelik. Mamandar, munda jastarǵa salmaq salýdyń áste qajeti joq dep esepteıdi. Sebebi búkil adamzat áleýmettik jelige baılanǵan kezeńde, jastardyń sol jolmen júreri belgili. Al áleýmettik jelide nasıhatyn júrgizip otyrǵandardyń yqpaly jastarǵa kóbirek bolyp tur.

Ásirese, keıbir dástúrdi joqqa shyǵaratyn dinı ýaǵyzshylardy alaıyq. Ár bir-eki jyljytýda aldyńnan atyp shyǵady. Anaý mundaı, mynaý andaı bolýy kerek degen sózder qulaǵymyzǵa jat bolmaı qalǵaly qaı zaman. Sondyqtan jastardyń úlgi tutatyny kúmándi ýaǵyzshylar men ómirindegi árbir qadamyn aıtyp otyratyn blogerler bolyp otyr.

Blogerlerdiń qaı jerine elikteıdi dersiz. Qazir qaı blogerdi almaıyq jaǵdaıy bar, qaltasy qalyńdaý keledi. Al endi qalyptasyp, ómirdiń baspaldaǵynan kóterilip kele jatqan jastar úshin jeńil ómir qaıtse de qyzyq qoı. Áıtse de, bárine birdeı topyraq shasha almaımyz. Jelide eńbek adamdarynyń, ustazdardyń, ǵalymdardyń jáne zııalylardyń jetkilikti deńgeıde nasıhattalmaýy bul taıaqtyń ekinshi ushy. Jastar jas shybyq sekildi, qaıda burasyń sonda ıiledi. Alaıda munda otbasydaǵy tárbıeni de umytpaǵan jón. Dastarhanynda Alashty aıtpaǵan, eńbektiń jaıyn sóz etpegen otbasynyń urpaǵy kimge elikteıtini anyq. Sol úshin de otbasyda ǵylymnyń paıdasyn, adal eńbektiń jemisin, Alashtyń el úshin qosqan úlesin tárbıemizge qosqanymyz abzal. Ol urpaq sonda ǵana kim ekenimizdi, kim bolǵanymyzdy umyttyrmaıdy!

Pikirler