وقۋ-اعارتۋ مينيسترلىگى ورتا ءبىلىم بەرۋ ۇيىمدارىندا 2023–2024 وقۋ جىلىنىڭ باستالۋ مەرزىمىن، ۇزاقتىعىن جانە كانيكۋل كەزەڭدەرىن بەكىتتى، دەپ حابارلايدى «ادىرنا» ءتىلشىسى.
باسقارمانىڭ مالىمەتىنشە، بيىلعى وقۋ جىلى 25 مامىردا اياقتالادى.
«ءبىرىنشى توقساندا وقۋ ۋاقىتى 8 اپتا، كۇزگى كانيكۋل 30 قازاننان 5 قاراشانى قوسا العاندا 7 كۇنگە سوزىلادى. ەكىنشى توقساندا 8 وقۋ اپتاسى، قىسقى كانيكۋل 2023 جىلدىڭ 29 جەلتوقسانىندا باستالادى، 2024 جىلدىڭ 7 قاڭتارىن قوسا العاندا كۇنتىزبەلىك 10 كۇنگە جالعاسادى. ءۇشىنشى توقسان 10 وقۋ اپتاسىنان تۇرادى. 11 كۇندىك كوكتەمگى كانيكۋل 2024 جىلدىڭ 21 ناۋرىزىندا باستالىپ، 31 ناۋرىزعا (قوسا العاندا) دەيىن جالعاسادى»،—دەپ جازدى مينيسترلىكتىڭ ءباسپاسوز قىزمەتى.
جىل سايىن ءبىرىنشى سىنىپ وقۋشىلارى ءۇشىن ءۇشىنشى توقساندا قوسىمشا دەمالىس بەرىلەدى، ۇزاقتىعى 7 كۇن – 2024 جىلدىڭ 5 اقپانىنان 11 اقپانعا (قوسا العاندا) دەيىنگى ۋاقىتتى قامتيدى. ءتورتىنشى توقساننىڭ ۇزاقتىعى 8 وقۋ اپتاسىن قۇرايدى. سونداي-اق 25 مامىردا قورىتىندى شىعارىلىپ، وقۋ جىلى اياقتالادى.
