الەۋمەتتىك جەلىدە ءدىنتانۋشى قابىلبەك ءالىپبايۇلىنىڭ «بالاسىن تاستاپ كەتكەن ايەلدى «شەشە» دەپ اتايدى» دەپ ايتقان سوزىنە قاتىستى قازاقستان مۇسىلماندارى ءدىني باسقارماسىنىڭ توراعاسى ناۋرىزباي قاجى تاعانۇلى بۇل قمدب پىكىرى ەمەس ەكەنىن مالىمدەدى، دەپ حابارلايدى «ادىرنا» ۇلتتىق پورتالى.
«بۇل ازاماتتىڭ ايتقان ءسوزى جەكە ءوزىنىڭ ويى بولار. بىراق ءبىز شەشە مەن انانى قادىر تۇتقان، قاسيەت تۇتقان جاندارمىز. ونى كەڭىنەن ناسيحاتتاپ كەلە جاتىرمىز. ءبىر ادامنىڭ پىكىرى ول ءمۇفتياتتىڭ پىكىرى ەمەس. وسىنى ايقىن ءبىلىپ الۋىمىز كەرەك. قمدب اكەگە قاتىستى، اناعا قاتىستى كوپتەگەن ۋاعىز ايتىپ ءجۇر. قازاقتىڭ كەز كەلگەن قۇندىلىعى ءبىز ءۇشىن قاسيەت سانالادى. شەشە دە، انا دا ءبىر ۇعىم. شەشە دە، انا دا ادامدى دۇنيەگە اكەلگەن ەڭ ارداقتىسى. ءبىز ونى ارقاشان قۇرمەتتەيمىز» - دەدى ناۋرىزباي قاجى تاعانۇلى.
باس ءمۇفتيدىڭ سوزىنشە، قابىلبەك ءالىپبايۇلى رەسپۋبليكالىق اقپاراتتىق ناسيحات توبىنىڭ مۇشەسى.
«ءبىز جاقىندا عانا رەسپۋبليكالىق جانە جەرگىلىكتى اقپاراتتىق ناسيحات توبىنىڭ تۇجىرىمدامالىق قۇجاتىن ازىرلەپ، ولاردىڭ قولدارىنا بەردىك. ۋاعىز بارىسىندا، حالىققا ءدارىس وتكىزۋ بارىسىندا نەگە كوڭىل ءبولنۋى كەرەك؟ قۇجاتتا جازىلعان. قابىلبەك ۇستاز قازىرگى تاڭدا رانت مۇشەسى بولىپ ەسەپتەلەدى. بىراق قازىر ساپاردا ءجۇر. ول ازاماتقا قاتىستى شەشىمدەر قابىلدانادى» - دەدى باس ءمۇفتي.
«ادىرنا» ۇلتتىق پورتالى
