اشعابات مەشىتتەرىندە جۇما كۇنگى ۋاعىز-ناسيحات كەزىندە يمامداردىڭ پرەزيدەنت گۋربانگۋلى بەردىمۇحامەدوۆتى سۇيۋگە شاقىرىپ، قۇدايدان وعان مىقتى دەنساۋلىق پەن ۇزاق ءومىر تىلەۋى - ۇيرەنشىكتى قۇبىلىس. ازاتتىقتىڭ تۇركىمەن قىزمەتى تىلشىلەرىنىڭ ايتۋىنشا، ەندى مەشىتتەردە "ۋاعىز-ناسيحاتقا پرەزيدەنتتىڭ جاۋلارىن" دا قوسا باستاعان.
ازاتتىقتىڭ تۇركىمەن قىزمەتىنىڭ تىلشىلەرى وتكەن جۇما كۇنگى ۋاعىز-ناسيحاتقا قاتىسىپ، يمامداردىڭ پرەزيدەنتتى ماداقتاپ قانا قويماي، ونىڭ جاۋلارىنا لاعىنەت ايتقانىن دا كوردى.
"اللا ونى بارلىق بالە-جالالاردان ساقتاسىن جانە دۇشپاندارى اياعىنا كەلىپ جىعىلسىن".
ازاتتىق تىلشىلەرى مامىردىڭ 17-ءسى كۇنى ايتىلعان يمامداردىڭ ۋاعىز-ناسيحاتىنان وسىلايشا ءۇزىندى كەلتىرەدى.
"جۇما نامازى اياقتالعاننان كەيىن بولاتىن ۋاعىز-ناسيحات كەزىندە يمام پرەزيدەنتتى ماداقتاي باستادى. ول ارقاداعتىڭ كەمەڭگەر ساياساتىنىڭ ارقاسىندا ەلدىڭ بارلىق جەتىستىككە قول جەتكىزىپ، ازاماتتاردىڭ باقىتتى ءومىر ءسۇرىپ جاتقانىن ايتتى. پايعامباردىڭ ءوز وتانىن سۇيگەنى ءتارىزدى ارقاداع پەن ءوز ەلىن جاقسى كورۋگە شاقىردى" دەدى اتى-ءجونىن ايتپاعان ازاتتىق ءتىلشىسى.
يمام سونىمەن بىرگە قاسيەتتى رامازان ايى كەزىندە "بارشا ازامات قۇدايدان تۇركىمەنستان ءارى قاراي دا دامي بەرسىن" دەپ تىلەۋى ءتيىس دەگەن.
"يمام قۇدايعا سىيىنىپ، پرەزيدەنت گۋربانگۋلى بەردىمۇحامەدوۆكە مىقتى دەنساۋلىق جانە ۇزاق ءومىر بەرۋىن سۇرادى. اللا بارلىق بالە-جالادان ساقتاپ، ونىڭ دۇشپاندارى مەن قارسىلاستارىن جازالاسىن دەپ ايتتى" دەيدى ءتىلشى.
ونىڭ ايتۋىنشا، مەشىتتە ادام كوپ بولعان جانە جۇما نامازىنا كەلگەندەردىڭ كوبى ءدىندى بيلىكتىڭ ۇگىت-ناسيحات قۇرالى رەتىندە پايدالانىپ جاتقانىنا نارازى بولعان.
"يمام ساياسي مالىمدەمەلەر ايتا باستاپ ەدى، كوبى "تاعى دا باستالدى" دەپ ءبىر-بىرىنە سىبىرلادى. ادامدار "بارلىق پروبلەما مەن قيىندىقتار سول ارقاداعتىڭ ارقاسىندا" دەستى" دەدى ازاتتىق ءتىلشىسى.
ول مەشىت قابىرعاسىنىڭ سىرتىندا "تۇركىمەنستان - باقىت پەن گۇلدەنۋ ورداسى" دەگەن جازۋى بار ۇلكەن باننەر ءىلىنىپ تۇرعانىن دا ايتتى.
"ازاتتىق" راديوسى
