اقتوبە قالاسىنا قاراستى الماتى اۋدانى قوقىس سالۋعا ارنالعان ەۋروكونتەينەر ساتىپ الۋعا بيۋدجەتتەن 121 249 996 تەڭگەگە ءبولدى، دەپ حابارلايدى «ادىرنا» ۇلتتىق پورتالىنىڭ ءتىلشىسى goszakup.gov.kz سايتىنا سىلتەمە جاساپ.
اقتوبە قالاسىنداعى الماتى اۋدانىنا ەۋروكونتەينەر ساتىپ الۋ تۋرالى تەندەردى بۇگىن، ياعني 17 قازان كۇنى «اقتوبە قالاسىنىڭ مەملەكەتتىك ساتىپ الۋلار ءبولىمى» جاريالاعان. تەندەر جەڭىمپازى 1 قاراشادا انىقتالادى.
تەحنيكالىق سيپاتتامادا قالا بيۋدجەتىنەن 121 249 996 تەڭگە ءبولىنىپ، ساتىپ الىنعالى وتىرعان1400 دانا پلاستيك ەۋروكونتەينەرلەر قاتتى تۇرمىستىق قالدىقتاردى جيناۋعا جانە ۋاقىتشا ساقتاۋعا ارنالعانى جانە قوقىس جينالاتىن ورىندارعا ورناتىلاتىنى جازىلعان. ەۋروكونتەينەرلەردىڭ سىيىمدىلىعى – 1100 ل كەم بولماۋى قاجەت. ولاردىڭ بولات تەمىردەن جاسالعان ءتورت تۇتقاسى مەن پلاستيكالىق دوڭگەلەكتەرى بولۋى كەرەك. سونداي-اق بەرىكتىگى كۇشتى، ديزاينى ادەمى، ءارى ىڭعايلى قاقپاق ورناتىلۋى قاجەت.
ۇزىندىعى – 1377 مم، ەنى – 1077 مم، بيىكتىگى – 1369 مم كەم بولماۋى ءتيىس. ءتۇسى – ستاندارتتى جاسىل، كونتەينەردىڭ سىيىمدىلىعى – 1,1 م³، سالماعى – 51,5 كگ. ماكسيمالدى جۇكتەمە – 440 كگ-نان كەم ەمەس. پايدالانۋ شارتتارى (تەمپەراتۋرا): -40 ° - + 50 ° س دەيىن. ۇسىنىلاتىن ەۋروكونتەينەرلەرگە جانە كونسترۋكتسيا ەلەمەنتتەرىنە كەپىلدىك – 12 اي. ەۋروكونتەينەرلەر ورناتۋ، جارامسىز كونتەينەرلەردى شىعارۋ جانە جيناۋ جۇمىستارىن تەندەردى ۇتىپ العان كومپانيا اتقارادى.
ءبىزدى مىنا سۇراق مازالايدى. بيۋدجەتتەن 121 249 996 تەڭگە قارجى ءبولىنىپ، 1400 دانا ەۋروكونتەينەر ساتىپ الىنادى ەكەن. ءار ەۋروكونتەينەردىڭ قۇنى – 86 607 تەڭگە. حالىقتىڭ قالتاسىنان جىرىپ، مەملەكەتتىك قازىنانىڭ قارجىسىنا ساتىپ الىنعالى وتىرعان وسى ەۋروكونتەينەرلەردىڭ كەپىلدىك ۋاقىتى بار بولعانى 12 اي. كەپىلدىك ۋاقىت بىتكەن سوڭ، اقتوبە قالاسىنىڭ الماتى اۋدانى تاعى جاڭا ەۋروكونتەينەرلەر ساتىپ الا ما؟ 121 249 996 تەڭگە از اقشا ەمەس. وعان ساتىپ الىناتىن تاۋاردىڭ جارامدىلىق مەرزىمىن ەڭ ازى ەكى جىلعا سوزۋعا نە كەدەرگى؟
بۇل سۇراقتى «اقتوبە قالاسىنىڭ مەملەكەتتىك ساتىپ الۋلار ءبولىمى» مەملەكەتتىك مەكەمەسى دە جولداۋدى ءجون سانادىق.
قانات بىرلىكۇلى
ادىرنا ۇلتتىق پورتالى
