قازاقستان ىشكى ىستەر ءمينيسترىنىڭ ورىنباسارى يگور لەپەحا پوليتسيا ەل ازاماتتارىنا رەسپۋبليكا كۇنىندە ميتينگى وتكىزۋگە مۇمكىندىك بەرمەيتىنىن مالىمدەدى، دەپ حابارلايدى «ادىرنا» ۇلتتىق پورتالى.
ۇلىسمەديا مالىمەتىنشە, ۇكىمەتتەگى بريفينگ كەزىندە جۋرناليستەر ءمينيستردىڭ ورىنباسارىنان 25 قازانداعى ميتينگكە كەلگەن ازاماتتاردى تاراتۋ ءۇشىن ەلورداعا ەلىمىزدىڭ ايماقتارىنان قاۋىپسىزدىك كۇشتەرى تارتىلاتىنى جايلى اقپارات قانشالىقتى شىندىققا جاناساتىنىن سۇراعان.
«وزدەرىڭىز بىلەسىزدەر، ءبىر جەردە اسكەري كولوننا كەتىپ بارا جاتسا – سوعىس باستالدى، پوليتسەيلەر ساپ تۇزەسە – قانداي دا ءبىر ميتينگ بولىپ جاتىر دەگەن وي پايدا بولادى. بۇگىن تەك 17 قازان، كىمنىڭ قايدا بەت العانىن، قانداي شاراعا دايىندالىپ جاتقانىن بىلمەيمىن. 25 قازان – بۇل مەملەكەتتىك مەرەكە جانە، ارينە، ءبىز وعان دايىندالامىز. ءبىز قىزمەت اتقارۋدىڭ كۇشەيتىلگەن نۇسقاسىنا كوشەمىز»، - دەدى يگور لەپەحا پوليتسيا كولىكتەرىنىڭ تىزبەسى استاناعا بەت العان ءساتى بەينەلەنگەن جەلىدەگى ۆيدەوعا تۇسىنىكتەمە بەرە وتىرىپ.
ول سونداي-اق قازىر ءىىم اكىمدىكتەن جوسپارلانىپ وتىرعان مەرەكەلەر بويىنشا دەرەكتەر سۇراپ وتىرعانىن اتاپ ءوتتى، ويتكەنى پوليتسەيلەر ادامدار كوپ جينالاتىن ورىنداردا قوعامدىق ءتارتىپتى قورعاۋدى قامتاماسىز ەتۋى كەرەك.
«25 قازانعا ارنالعان ۇندەۋلەرگە كەلەتىن بولساق، قدت مۇشەلەرىن نارازىلىققا شىعۋعا شاقىرىپ جاتىر، بۇل – قازاقستان اۋماعىندا قىزمەتى زاڭسىز دەپ تانىلعان ەكسترەميستىك ۇيىم جانە، ارينە، ءبىز ەشقانداي ميتينگىلەر وتكىزۋگە جول بەرمەيمىز»، – دەپ قورىتىندىلادى يگور لەپەحا.
قازاقستاننىڭ دەموكراتيالىق تاڭداۋى (قدت) – 2001 جىلى مۇحتار ءابليازوۆ قۇرعان قوعامدىق-ساياسي قوزعالىس. 2018 جىلى استانا قالاسى ەسىل اۋداندىق سوتىنىڭ شەشىمىمەن قدت ەكسترەميستىك ۇيىم رەتىندە تانىلدى. ول الەۋمەتتىك جەلى ارقىلى 25 قازان كۇنى ەلدى ميتينگىگە شىعۋعا ۇگىتتەپ جاتىر.
«ادىرنا» ۇلتتىق پورتالى
