تاراز قالاسى №2 سوتىنىڭ ۇكىمىمەن تاراز قالاسى اكىمدىگىنىڭ جەر قاتىناستارى ءبولىمىنىڭ باسشىسى جانە بۇرىنعى سەكتور مەڭگەرۋشىسى لاۋازىمدىق مىندەتتەرىن اسىرا پايدالانعانى ءۇشىن سوتتالدى. بۇل تۋرالى وبلىستىق پروكۋراتۋرا ءمالىم ەتتى، دەپ حابارلايدى «ادىرنا» ۇلتتىق پورتالى.
بەلگىلى بولعانداي، مەملەكەتتىك قىزمەتكەرلەردىڭ قىلمىستىق ارەكەتتەرى پروكۋرورلار جۇرگىزگەن تالداۋ بارىسىندا انىقتالعان.«اتاپ ايتقاندا، لاۋازىمدى تۇلعالار 3,56 گەكتار اۋىل شارۋاشىلىعى ماقساتىنداعى جەر تەلىمىن زاڭسىز تاركىلەپ، ونى ەكى كوممەرتسيالىق جالپى اۋدانى 3,56 گەكتار جەر تەلىمىنە ايىرباستادى. الايدا مەملەكەت مۇددەسى ءۇشىن اۋىل شارۋاشىلىعى ماقساتىنداعى ۋچاسكەنى الىپ قويۋدىڭ قاجەتى جوق ەدى. سونىمەن قاتار، جەر تەلىمدەرىنىڭ باعاسى تەڭ ەمەس بولعانىنا قاراماستان ايىرباستاپ، مەملەكەت مۇددەلەرىنە 121 ملن. تەڭگەدەن استام سوماعا زالال كەلتىرۋگە اكەپ سوقتىردى. كوممەرتسيالىق ماقساتتاعى ەكى ۋچاسكەدە 14 شاعىن اۋداندا ورنالاسقان جانە ولاردى اۋكتسيوندا ساتۋ جەرگىلىكتى بيۋدجەتكە تابىس اكەلەتىن ەدى. بىراق مەملەكەتتىڭ ورنىنا جەكە ادامدار پايدا تاپتى: ياعني، اۋدانى 1,3 گەكتار بولاتىن ءبىر ۋچاسكە اۆتوسالونعا 93 ملن تەڭگەگە ساتىلعان»، – دەلىنگەن حابارلامادا.وسى دەرەك بويىنشا تاراز قالاسىنىڭ پروكۋراتۋراسى قر قك 361-بابى 3-بولىگىنىڭ 4-تارماعى بويىنشا سوتقا دەيىنگى تەرگەپ-تەكسەرۋدى باستاپ، تەرگەۋ جامبىل وبلىسى بويىنشا سىبايلاس جەمقورلىققا قارسى قىزمەتكە تاپسىرىلدى. سوت جەر قاتىناستارى ءبولىمىنىڭ باسشىسىن قر قك 361-بابىنىڭ 3-بولىگىنىڭ 4-تارماعى، ال بۇرىنعى سەكتور مەڭگەرۋشىسىن قر قك 361-بابىنىڭ 3-بولىگىنىڭ 4-تارماعى، 24-بابىنىڭ 5-بولىگى بويىنشا كىنالى دەپ تاۋىپ، ولارعا مەملەكەتتىك لاۋازىمداردى اتقارۋ قۇقىعىنان ءومىر بويىنا ايىرا وتىرىپ، ەكەۋىن دە 4 جىلعا باس بوستاندىعىنان ايىرۋعا ۇكىم شىعاردى. سوت شەشىمىمەن جەر ۋچاسكەلەرى مەملەكەتتىك قورعا قايتارىلدى. ۇكىم زاڭدى كۇشىنە ەنگەن جوق.
«ادىرنا» ۇلتتىق پورتالى
