بۇگىن 19 قازان - قۇتقارۋشىلار كۇنى، دەپ حابارلايدى «ادىرنا» ۇلتتىق پورتالى.
1995 جىلى قازاقستان رەسپۋبليكاسى پرەزيدەنتىنىڭ جارلىعىمەن قازاقستان رەسپۋبليكاسىنىڭ توتەنشە جاعدايلار جونىندەگى مەملەكەتتىك كوميتەت قۇرىلدى. سول قۇجاتقا سايكەس 19 قازان قۇتقارۋشىلار كۇنى بولىپ بەكىتىلدى. ەلىمىز ءوز ەگەمەندىگىن العانعا دەيىن قازاقستاندا كاسىبي اپاتتىق-قۇتقارۋ قىزمەتى بولماعان. ارنايى قىزمەت قۇرىلماي تۇرعاندا ادامداردى توتەنشە قۇتقارۋ قىزمەتىن قوعامدىق ۇيىمدار نەمەسە قۇتقارۋ بەكەتتەرى اتقارعان بولاتىن. توتەنشە جاعدايلار قىزمەتى تاۋەلسىزدىك الىپ، ەلدىڭ كونستيتۋتسياسى قابىلدانعان سوڭ پايدا بولدى. قازىرگى تاڭدا قۇتقارۋشىلار توتەنشە جاعدايلاردى جويۋ جۇمىستارىنا ارقاشان دايىن بولۋ ءۇشىن ارنايى، مەديتسينالىق، پسيحولوگيالىق ازىرلىگىن، اۆاريالىق-قۇتقارۋ قۇرىلىمدارىنىڭ قۇرامىنداعى قىزمەت داعدىلارىن ۇنەمى جەتىلدىرىپ وتىرادى. بۇگىندە ەلىمىزدەگى قۇتقارۋ قىزمەتى تەك وتانىمىزعا عانا ەمەس، وزگە دە مەملەكەتتەردە بولعان اپاتتى جاعدايلاردا كومەك قولىن سوزىپ، قىزمەتىن ابىرويمەن اتقارىپ كەلەدى. ەسكە سالساق، بيىل قازاقستاندىق قۇتقارۋشىلار تۇركيادا جانە اۋعانستاندا بولعان جەر سىلكىنىسىنىڭ زاردابىن جويۋ ءۇشىن اتالعان مەملەكەتتەرگە ارنايى بارىپ، كومەك كورسەتكەن بولاتىن. قازاقستان قۇتقارۋشىلارى 7-19 اقپان ارالىعىندا تۇركيانىڭ ءۇش پروۆينتسياسىنىڭ اۋماعىندا ىزدەستىرۋ-قۇتقارۋ جۇمىستارىن جۇرگىزدى. اتاپ ايتقاندا، نۋرداگى اۋدانىندا، گازيانتەپ جانە حاتاي قالالارىندا ازاماتتاردى ۇيىندىلەردەن شىعارۋعا اتسالىستى. سونىمەن بىرگە قاحرامانماراش پروۆينتسياسىنا ۇزدىكسىز گۋمانيتارلىق كومەك جەتكىزىپ وتىردى.
ول كەزدە جاساق قۇرامىندا قازاقستان تجم قۇتقارۋشىلارى، كينولوگيالىق ەسەپتەر جانە اپاتتار مەديتسيناسى ورتالىعىنىڭ دارىگەرلەرى بولدى.
اپات ايماقتارىندا جۇمىس ىستەگەن قازاقستاندىق مامانداردىڭ سانى جۇزدەن استى. جەدەل توپتىڭ قۇرامىنا استانا، الماتى قالالارىنىڭ، قاراعاندى جانە اقمولا وبلىستارىنىڭ ماماندارى، سونداي-اق اپاتتار مەديتسيناسى ورتالىعىنىڭ مەديتسينا قىزمەتكەرلەرى كىردى.
ىزدەستىرۋ-قۇتقارۋ جۇمىستارى قر توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆتىڭ باسشىلىعىمەن جۇرگىزىلدى. جۇكتەلگەن مىندەتتەر قاۋىپسىزدىك تەحنيكاسىن ساقتاي وتىرىپ، تولىق كولەمدە ورىندالدى.
ىزدەستىرۋ-قۇتقارۋ جۇمىستارى كەزىندە 15-18 ادامنان تۇراتىن ارنايى توپتاردىڭ ۇيىمشىلدىعى ناتيجەسىندە ۇيىندىلەردەن تۇركيانىڭ 7 ازاماتى قۇتقارىلىپ، قازا تاپقانداردىڭ 88 ءمايىتى الىندى.
سونداي-اق 200-گە جۋىق تۇرعىنعا مەديتسينالىق جانە پسيحولوگيالىق كومەك كورسەتىلدى. مۇندايدا ءار مينۋتتىڭ ماڭىزى زور بولعاندىقتان قۇتقارۋشىلار تاۋلىك بويى ءۇش اۋىسىممەن جۇمىس ىستەدى.
سونىمەن قاتار وسى جاقىندا، 10-16 قازان ارالىعىندا ءبىزدىڭ قۇتقارۋشىلار جەر سىلكىنىسىنىڭ سالدارىن جويۋعا كومەك كورسەتۋ ماقساتىندا اۋعانستانعا بارىپ كەلدى.
گۋمانيتارلىق ميسسيانى ورىنداۋ ءۇشىن جالپى 45 ادام، ونىڭ ىشىندە تجم رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى، كينولوگيالىق ەسەپتوپتار، اپاتتار مەديتسيناسى ورتالىعىنىڭ دارىگەرلەرى مەن فەلدشەرلەرى جىبەرىلگەن ەدى.
ازاماتتىق قورعانىس جانە اسكەري بولىمدەرى كوميتەتى توراعاسىنىڭ مىندەتىن اتقارۋشى، گەنەرال-مايور ۇلاربەك ابىكەەۆتىڭ باسشىلىعىمەن قازاقستاندىق قۇتقارۋشىلار جاساعى قويىلعان مىندەتتەردى ابىرويمەن ورىندادى.
اۋعانستانداعى ىزدەستىرۋ-قۇتقارۋ جۇمىستارىن جۇرگىزۋ بارىسىندا قازاقستان تجم قۇتقارۋشىلارى جەرگىلىكتى 83 تۇرعىنعا مەديتسينالىق كومەك كورسەتىپ، 211 ءۇي فراگمەنتىنىڭ ءۇيىندىسىن بولشەكتەدى. نايبروفي ەلدى مەكەنىندە قيراعان 700 ءۇيدىڭ ۋچاسكەسىن تەكسەردى.
ءۇيىندى اراسىنان 1 بالانىڭ دەنەسىن تاۋىپ، الىپ شىقتى. قاتتى شاڭدى داۋىلدان زارداپ شەككەن 9 شاتىرلى قالاشىقتىڭ ورنالاسۋ ورىندارىندا تەكسەرۋ جۇرگىزىلدى. قازاقستاندىق قۇتقارۋشىلار سياحان ەلدى مەكەنىندە تولىعىمەن قيراعان ۇيلەردىڭ استىن دا تەكسەرىپ، چولك ەلدى مەكەنىندە ۇيىندىلەردى بولشەكتەۋ جۇمىستارىن جۇرگىزدى.
«ادىرنا» ۇلتتىق پورتالى
