Bügın 19 qazan - Qūtqaruşylar künı, dep habarlaidy «Adyrna» ūlttyq portaly.
1995 jyly Qazaqstan Respublikasy Prezidentınıŋ Jarlyǧymen Qazaqstan Respublikasynyŋ tötenşe jaǧdailar jönındegı memlekettık komitet qūryldy. Sol qūjatqa säikes 19 qazan Qūtqaruşylar künı bolyp bekıtıldı. Elımız öz egemendıgın alǧanǧa deiın Qazaqstanda käsıbi apattyq-qūtqaru qyzmetı bolmaǧan. Arnaiy qyzmet qūrylmai tūrǧanda adamdardy tötenşe qūtqaru qyzmetın qoǧamdyq ūiymdar nemese qūtqaru beketterı atqarǧan bolatyn. Tötenşe jaǧdailar qyzmetı Täuelsızdık alyp, eldıŋ konstitusiiasy qabyldanǧan soŋ paida boldy. Qazırgı taŋda qūtqaruşylar tötenşe jaǧdailardy joiu jūmystaryna ärqaşan daiyn bolu üşın arnaiy, medisinalyq, psihologiialyq äzırlıgın, avariialyq-qūtqaru qūrylymdarynyŋ qūramyndaǧy qyzmet daǧdylaryn ünemı jetıldırıp otyrady. Bügınde elımızdegı qūtqaru qyzmetı tek Otanymyzǧa ǧana emes, özge de memleketterde bolǧan apatty jaǧdailarda kömek qolyn sozyp, qyzmetın abyroimen atqaryp keledı. Eske salsaq, biyl qazaqstandyq qūtqaruşylar Türkiiada jäne Auǧanstanda bolǧan jer sılkınısınıŋ zardabyn joiu üşın atalǧan memleketterge arnaiy baryp, kömek körsetken bolatyn. Qazaqstan qūtqaruşylary 7-19 aqpan aralyǧynda Türkiianyŋ üş provinsiiasynyŋ aumaǧynda ızdestıru-qūtqaru jūmystaryn jürgızdı. Atap aitqanda, Nurdagy audanynda, Gaziantep jäne Hatai qalalarynda azamattardy üiındılerden şyǧaruǧa atsalysty. Sonymen bırge Qahramanmaraş provinsiiasyna üzdıksız gumanitarlyq kömek jetkızıp otyrdy.
Ol kezde jasaq qūramynda Qazaqstan TJM qūtqaruşylary, kinologiialyq esepter jäne Apattar medisinasy ortalyǧynyŋ därıgerlerı boldy.
Apat aimaqtarynda jūmys ıstegen qazaqstandyq mamandardyŋ sany jüzden asty. Jedel toptyŋ qūramyna Astana, Almaty qalalarynyŋ, Qaraǧandy jäne Aqmola oblystarynyŋ mamandary, sondai-aq Apattar medisinasy ortalyǧynyŋ medisina qyzmetkerlerı kırdı.
Izdestıru-qūtqaru jūmystary QR Tötenşe jaǧdailar bırınşı vise-ministrı İbragim Külşımbaevtyŋ basşylyǧymen jürgızıldı. Jüktelgen mındetter qauıpsızdık tehnikasyn saqtai otyryp, tolyq kölemde oryndaldy.
Izdestıru-qūtqaru jūmystary kezınde 15-18 adamnan tūratyn arnaiy toptardyŋ ūiymşyldyǧy nätijesınde üiındılerden Türkiianyŋ 7 azamaty qūtqarylyp, qaza tapqandardyŋ 88 mäiıtı alyndy.
Sondai-aq 200-ge juyq tūrǧynǧa medisinalyq jäne psihologiialyq kömek körsetıldı. Mūndaida är minuttyŋ maŋyzy zor bolǧandyqtan qūtqaruşylar täulık boiy üş auysymmen jūmys ıstedı.
Sonymen qatar osy jaqynda, 10-16 qazan aralyǧynda bızdıŋ qūtqaruşylar jer sılkınısınıŋ saldaryn joiuǧa kömek körsetu maqsatynda Auǧanstanǧa baryp keldı.
Gumanitarlyq missiiany oryndau üşın jalpy 45 adam, onyŋ ışınde TJM Respublikalyq jedel-qūtqaru jasaǧynyŋ qūtqaruşylary, kinologiialyq eseptoptar, Apattar medisinasy ortalyǧynyŋ därıgerlerı men feldşerlerı jıberılgen edı.
Azamattyq qorǧanys jäne äskeri bölımderı komitetı töraǧasynyŋ mındetın atqaruşy, general-maior Ūlarbek Äbıkeevtıŋ basşylyǧymen qazaqstandyq qūtqaruşylar jasaǧy qoiylǧan mındetterdı abyroimen oryndady.
Auǧanstandaǧy ızdestıru-qūtqaru jūmystaryn jürgızu barysynda Qazaqstan TJM qūtqaruşylary jergılıktı 83 tūrǧynǧa medisinalyq kömek körsetıp, 211 üi fragmentınıŋ üiındısın bölşektedı. Naibrofi eldı mekenınde qiraǧan 700 üidıŋ uchaskesın tekserdı.
Üiındı arasynan 1 balanyŋ denesın tauyp, alyp şyqty. Qatty şaŋdy dauyldan zardap şekken 9 şatyrly qalaşyqtyŋ ornalasu oryndarynda tekseru jürgızıldı. Qazaqstandyq qūtqaruşylar Siiahan eldı mekenınde tolyǧymen qiraǧan üilerdıŋ astyn da tekserıp, Cholk eldı mekenınde üiındılerdı bölşekteu jūmystaryn jürgızdı.
«Adyrna» ūlttyq portaly
