شىمكەنتتەگى جەكەمەنشىك بالاباقشالار جابىلۋدىڭ از-اق الدىندا تۇر، دەپ حابارلايدى «ادىرنا» ۇلتتىق پورتالى 31 ارناسىنا سىلتەمە جاساپ.
سەبەبى، مەكتەپكە دەيىنگى ءبىلىم بەرۋ مەكەمەلەرىنە تالاپ كۇشەيگەن. بۇدان بىلاي بالاباقشاداعى بەينەباقىلاۋ كامەرالارى پوليتسيا دەپارتامەنتىنىڭ جۇيەسىنە جالعانىپ، كىرە بەرىسكە تۋرنيكەتتەر ورناتىلۋى ءتيىس. بىراق بۇل ەرەجەنى جۇزەگە اسىرۋعا بالاباقشالار ءالى دايىن ەمەس. مەملەكەتتەن ءار بالاعا سۋبسيديا الاتىن كاسىپكەرلەر ءبىلىم باسقارماسىنان جاڭا ەرەجەگە وزگەرىس ەنگىزۋدى سۇراپ وتىر.
شىمكەنتتەگى 534 جەكەمەنشىك بالاباقشانىڭ مەڭگەرۋشىلەرى قازىر تىعىرىققا تىرەلگەن. جاڭا زاڭناما بويىنشا ەندى بوبەكجايداعى بەينەكامەرالار تىكەلەي پوليتسيا دەپارتامەنتىنە جالعانۋى كەرەك.
سونداي-اق عيماراتتىڭ كىرە بەرىسىنە تۋرنيكەتتەر ورناتىلۋى ءتيىس. بارلىعىن ورىنداۋعا ءبىر اي ۋاقىت بەرىلگەن. بىراق بالاباقشا باسشىلارى جاڭا ەرەجەنىڭ كەمشىن تۇستارىن جىپكە ءتىزىپ، ءالى دايىن ەمەسپىز دەپ وتىر.
«سەرۆەردە بارلىعىن قامتاماسىز ەتۋگە ورىن جوق دەپ جاتىر. 100% تسوو-عا قوسىلماعان. جابىلىپ قالۋى مۇمكىن. بارلىق باسقا تالاپتار ورىندالىپ جاتسا، بۇعان باسقا جاعىنان زاڭ قاراستىرىپ كورەمىز»، – دەيدى «ۇزدىكسىز ءبىلىم بەرۋ» قاۋىمداستىعى فيليالىنىڭ ديرەكتورى ديانا قارمانوۆا.
مەكتەپكە دەيىنگى ءبىلىم بەرۋ مەكەمەلەرىنىڭ يەلەرى باقىلاۋ كامەراسىن پوليتسيا دەپارتامەنتىنە جالعاۋ ءۇشىن 760 مىڭ تەڭگە كەرەك دەيدى. كاسىپكەرلەر بۇل قاراجات قالتامىزعا سالماق تۇسىرەدى. ال، 1,5 مەترلىك تۋرنيكەتتىڭ 3 جانە 5 جاستاعى بالالارعا قاجەتى شامالى ەكەنىن جەتكىزدى. الايدا بۇل پىكىرمەن ءبىلىم باسقارماسىنىڭ باسشىسى كەلىسپەيدى.
«بالالاردىڭ قاۋىپسىزدىگى باستى نازاردا. سوندىقتان ءاربىر ءبىلىم بەرۋ مەكەمەسىندە قاۋىپسىزدىك جاعدايلارى جاسالۋى كەرەك. ەكىنشى ماسەلە قازىرگى قاراشا ايىندا وتەتىن اكتۋاليزاتسيا بويىنشا ءبىز ونى زاڭنامالىق تۇرعىدا زاڭگەرلەرمەن سويلەسىپ، شەشىمىن تابۋعا تىرىسامىز دەپ ۋادە بەردىم جاڭا»، – شىمكەنت قالالىق ءبىلىم باسقارماسىنىڭ باسشىسى نۇرگۇل شامشيەۆا.
ءبىلىم باسقارماسىنداعىلار كاسىپكەرلەردىڭ نارازىلىعىن تۋعىزعان زاڭنامانى تاعى ءبىر پىسىقتاۋعا ۋادە بەردى. بالالاردىڭ قاۋىپسىزدىگىن قامتاماسىز ەتۋ ماقساتىندا ەنگىزىلگەن وزگەرىستەردى بالاباقشالاردان بولەك جەكەمەنشىك مەكتەپتەر دە جۇزەگە اسىرۋى ءتيىس.
«ادىرنا» ۇلتتىق پورتالى
