الماتى وبلىسىندا تۇرعىن ۇيدە گاز بالونى جارىلىپ، الاپات ءورت بولدى، دەپ حابارلايدى "ادىرنا" ءتىلشىسى.
21 قازان كۇنى تالعار اۋدانىنداعى تۇرعىن ۇيدە بولعان الاپات ءورتتىڭ بەينەجازباسى الەۋمەتتىك جەلىدە تاراپ كەتتى. وقيعا ورنىندا بولعان كۋاگەرلەر قىزىل جالىننىڭ قالاي باستالعانىن ءتۇسىرىپ العان.
بەينەجازبا اۆتورى ورتكە ورانعان ۇيدە گاز بالونى جارىلىپ، قاتتى داۋىستىڭ ەستىلگەنىن ايتادى. وزگە تۇرعىندار دا بۇل جارىلىستى ەستىگەنىن ايتىپ، كەيىن قويۋ قارا ءتۇتىندى بايقاعان.
ال الماتى وبلىستىق توتەنشە جاعدايلار دەپارتامەنتىنىڭ مالىمدەۋىنشە، ۇيدە گاز بالونى جارىلماعان.
"21 قازان كۇنى ساعات 19:06-دا الماتى وبلىسى توتەنشە جاعدايلار دەپارتامەنتىنىڭ ءورت سوندىرۋشىلەرى تالعار قالاسىنا كەزەكتى شاقىرتۋعا شىقتى. وقيعا ورنىنا جەتكەن كەزدە امانگەلدى كوشەسىندەگى جەكە تۇرعىن ءۇيدىڭ جالپى الاڭى 150 شارشى مەتردى قۇرايتىن شارۋالىق قۇرىلىستارى، مونشا، ساراي ورتەنىپ، جوعارى تەمپەراتۋرانىڭ اسەرىنەن شاتىردىڭ قاپتامالارى ەرىگەن بەلگىلى بولدى",-دەلىنگەن.
5 تەحنيكاسى جۇمىلدىرىلىپ، قىزىل جالىندى سوندىرگەن. ورتتەن زارداپ شەككەندەر مەن قۇرباندار جوق. قازىر ءورتتىڭ شىعۋ سەبەبى انىقتالۋدا.
