مەملەكەت جانە قوعام قايراتكەرى، پروفەسسور مىرزاتاي جولداسبەكوۆ جازۋشى اقسەلەۋ سەيدىمبەكتىڭ جۇمباق جاعدايدا قايتىس بولعانىن ايتتى، دەپ حابارلايدى "ادىرنا" ءتىلشىسى.
عالىمنىڭ "ايقىن" يۋتۋب ارناسىندا شىققان سۇحباتىندا اقسەلەۋ سەيدىمبەكتىڭ قازاسىن "ەڭ ۇلكەن قايعى" دەپ اتاعان.
قايراتكەردىڭ سوزىنشە، بۇل قازا - بۇكىل قازاقتىڭ باسىنا تۇسكەن اۋىر قايعى.
"اقسەلەۋ مارعۇلاننان كەيىن كىشى مارعۇلان دەيمىن. اقسەلەۋ قايتىس بولعاندا، قابىرعام قاۋسادى. ەۋرازيا ۋنيۆەرسيتەتىنە رەكتور بولىپ كەلگەندە، ەڭ ءبىرىنشى سالەم بەرگەن - اقسەلەۋ. "قايدا ءجۇرسىڭ" دەسەم، "پرەزيدەنت مادەنيەت ورتالىعىندا" دەدى. جۋرناليستيكا كافەدراسىنا باستىق قىلىپ قويدىم. اقسەلەۋ قويشىعارا ەكەۋى ۇنەمى قاسىمدا ءجۇردى. ءبىر ءسات قاسىمنان قالدىرعان ەمەسپىن. اتتەڭ، اقسەلەۋ. اتتەڭ، اقسەلەۋىم. اۋرۋحاناعا بارىپ، قارالىپ جاتىر ەدىم، يمانعالي زۆوندادى. "مىرزەكە، سۇمدىق بولىپ جاتىر. احاڭ قايتىس بولدى" دەيدى. تاستاي سالىپ كەلدىم. نەسىپبەك ەكەۋى جايعاستىرىپ قويىپتى. ۇيىندە جالعىز بولعان. وزىنە قول سالعان. مىلتىقپەن اۋىزعا سالىپ، تاس تالقانىن شىعارىپ اتىپ جىبەرگەن. نەدەن بولدى، قالاي بولدى، بۇل جاعىن بىلمەيمىن. سونداي وپىناتىنداي ەشتەڭە جوق سياقتى ەدى. قايدا بارسا، ەل سىيلايتىن اقسەلەۋ ەدى. كەيىنگى كەزدە قازاقتىڭ باسىنا قونعان ۇلكەن قايعى دەپ ويلايمىن", - دەيدى ول سۇحباتتا.
ەسكە سالايىق، ەتنوگراف-عالىم، فيلولوگيا عىلىمدارىنىڭ دوكتورى، پروفەسسور، قر مەملەكەتتىك سىيلىعىنىڭ يەگەرى، قازاقستان جازۋشىلار وداعىنىڭ مۇشەسى اقسەلەۋ سەيدىمبەك 67 جاسقا قاراعان شاعىندا، 2009 جىلدىڭ 16 قىركۇيەگىندە ومىردەن وزدى.
