استاناداعى تۇڭعىش پرەزيدەنتتىڭ اتىنا بەرىلگەن نازارباەۆ كىتاپحاناسى ەندى ورتالىق رەتىندە جۇمىس ىستەيدى. بۇل تۋرالى قازاقستان رەسپۋبليكاسى پرەزيدەنتىنىڭ ءىس باسقارماسى مالىمدەدى، دەپ حابارلايدى “ادىرنا” ۇلتتىق پورتالى.
مەملەكەتتىڭ العاشقى تۇلعالارىنىڭ تاريحي مۇراسىن ساقتاۋ — الەمدىك تاجىريبە. اتالعان ءداستۇر پرەزيدەنت ورتالىقتارى مەن كىتاپحانالاردىڭ قىزمەتىندە كورىنىس تاپتى. تاريحي-مەموريالدى مەكەمەلەر اقش، فرانتسيا، تۇركيا، قىتاي، مالايزيا، ازەربايجان جانە الەمنىڭ باسقا ەلدەرىندە بار. ولار مۇراعات، كىتاپحانا جانە مۇراجاي فۋنكتسياسىن بىرىكتىرە وتىرىپ، ۇلت كوشباسشىلارىنىڭ قىزمەتىنە قاتىستى قۇندى دەرەكتەردى، كىتاپ، كيىم ارتەفاكتىلەرىن ساقتايدى، دەلىنگەن حابارلامادا.
قر پرەزيدەنتى ءىس باسقارماسى اقش-تىڭ تاجىريبەسىن كەلتىرە وتىرا، 1955 جىلعى پرەزيدەنتتىك كىتاپحانالار تۋرالى زاڭعا سايكەس امەريكالىق پرەزيدەنتتەردىڭ مۇراسىن ساقتاۋ ميسسياسىن جۇزەگە اسىراتىن 15 مەكەمە جۇمىس ىستەيتىنىن ايتتى.
ەڭ تانىمالى — نيۋ-يوركتەگى فرانكلين رۋزۆەلت، بوستونداعى دجون كەننەدي، كاليفورنياداعى رونالد رەيگان كىتاپحانالارى.
جالپى الەمدىك داستۇرگە سۇيەنە وتىرىپ ەلىمىزدە قر تۇڭعىش پرەزيدەنتى كىتاپحاناسىنىڭ بازاسىندا تاۋەلسىز قازاقستان كوشباسشىلارىنىڭ تاريحي مۇراسىن ساقتاۋمەن، زەردەلەۋمەن جانە ىلگەرىلەتۋمەن اينالىسۋعا ارنالعان پرەزيدەنتتىك ورتالىق قۇرىلدى. وندا قازاقستان پرەزيدەنتتىگى ينستيتۋتىنا قاتىسى بار جادىگەرلەر ورتالىقتاندىرىلعان تۇردە ساقتالادى. جاڭادان قۇرىلعان ورتالىققا ەكس-پرەزيدەنت نۇرسۇلتان نازارباەۆتىڭ جەكە مۇراعاتى مەن جەكە كىتاپحاناسىنىڭ ماتەريالدارى، سونداي-اق بۇرىن تۇڭعىش پرەزيدەنت كىتاپحاناسىندا ساقتالعان مۇراجاي ەكسپوناتتارىنىڭ جيناعى بەرىلدى. بۇگىنگى تاڭدا قوردا 150 مىڭنان استام مۇراعات قۇجاتتارى، 40 مىڭ كىتاپ جانە 12 مىڭ مۇراجاي زاتتارى بار، — دەيدى باسقارمادان.
رەسمي اقپاراتتا ايتىلعانداي، بولاشاقتا جاڭا ورتالىققا تاريحي-مادەني قۇندىلىعى بار جەكە قۇجاتتار مەن قازىرگى پرەزيدەنتتىڭ كەرەك-جاراقتارى دا بەرىلەدى. الداعى ۋاقىتتا قازاقستاننىڭ كەلەسى پرەزيدەنتتەرىنىڭ قىزمەتى تۋرالى ءتيىستى ماتەريالدار جيناقتالادى.
ودان بولەك، ورتالىقتا قازاقستان كوشباسشىلارىنىڭ قۇجاتتارىمەن قاتار تاۋەلسىزدىك تاريحىنا قاتىستى ماتەريالداردى جيناۋ، جۇيەلەۋ جانە زەردەلەۋ جوسپارلانۋدا.
سونداي-اق، قازاقستاننىڭ قازىرگى ساياسي تاريحىنا ارنالعان ءىرى تاريحي-مەموريالدى، عىلىمي جانە مادەني-اعارتۋ ورتالىعىنا اينالۋدى ماقسات ەتۋدە.
باسقارمانىڭ مالىمەتىنە سۇيەنسەك، پرەزيدەنت ورتالىعىنىڭ كىتاپحاناسى دا قىزىعۋشىلىق تۋعىزادى، وندا پرەزيدەنتتىك ينستيتۋت، مەملەكەتتىك قۇرىلىستىڭ تەورياسى مەن پراكتيكاسى، قازاقستان مەن ورتالىق ازيا ەلدەرىنىڭ مەملەكەتتىلىك تاريحى بويىنشا عىلىمي جانە مەرزىمدى باسىلىمدار شوعىرلانادى. الەمنىڭ جەتەكشى كىتاپحانالارىنىڭ نىسانالى قورىنا قاشىقتان قول جەتكىزۋگە بولادى.
عالىمدار مەن ستۋدەنتتەر پرەزيدەنت ورتالىعىنان ديسسەرتاتسياسى مەن عىلىمي زەرتتەۋلەرى ءۇشىن وسى تاقىرىپتا سيرەك كەزدەسەتىن جانە بىرەگەي ماتەريالداردى تابا الادى.
