اقپارات جانە قوعامدىق دامۋ ءمينيسترى ايدا بالاەۆا كىتاپحاناشىلاردى ءتول مەرەكەسىمەن قۇتتىقتادى. بۇل تۋرالى ول ءوزىنىڭ Facebook پاراقشاسىندا جازدى، دەپ حابارلايدى، “ادىرنا” ۇلتتىق پورتالى.
قۇتتىقتاۋ ءماتىنىن تومەنگە ۇسىنامىز:
بۇگىن ەلىمىزدە باعا جەتپەس قازىنالارىمىزدىڭ ءبىرى - كىتاپتارىمىزدى كوزدىڭ قاراشىعىنداي ساقتاپ جۇرگەن كىتاپحاناشىلارىمىزدىڭ كاسىبي مەرەكەسى.
مەملەكەت باسشىسى جاس ۇرپاقتى ۇلتتىق قۇندىلىق نەگىزىندە تاربيەلەپ جۇرگەن كىتاپحاناشىلار مەن كىتاپحانالار جاعدايىنا ايرىقشا كوڭىل بولەدى. وعان نەگىز دە بار. قازىرگى تاڭدا ەلىمىزدە 25 مىڭنان استام كىتاپحاناشى، 11 مىڭعا جۋىق كىتاپحانا، 328 ميلليوننان استام كىتاپ قورى بار. بۇل ەلىمىز ءۇشىن باعا جەتپەس رۋحاني بايلىق.
ۇكىمەت قاۋلىسىمەن بەكىتىلگەن بۇگىنگى داتا كەزدەيسوق ەمەس. ەلىمىزدەگى ەڭ العاشقى كىتاپحانا باتىس قازاقستان وبلىسىندا وسىدان 152 جىل بۇرىن 24 قازان كۇنى ەسىگىن اشقان. بۇگىندە جۇبان مولداعاليەۆ اتىنداعى امبەباپ عىلىمي كىتاپحانا وڭىردەگى 360 كىتاپحانانىڭ ادىستەمەلىك ورتالىعى سانالادى.
جالپى قازاقستان بويىنشا ەڭ ۇلكەن كىتاپحانا – الماتى قالاسىنداعى ۇلتتىق كىتاپحانا. مۇندا قازىر 7 ميلليوننان استام كىتاپ قورى بار.
سوڭعى كەزدە كىتاپ وقۋ ترەندى قايتا جاڭعىرىپ، وقىرماندار سانى 9,5 ميلليونعا جەتتى. اسىرەسە، اتا-انالار بالا تاربيەلەۋدە كىتاپتىڭ كومەگىنە كوبىرەك جۇگىنەدى. بۇلدىرشىندەردى وسى كۇندەرى فانتاستيكا جانە كوميكس جانرى ەرەكشە قىزىقتىرادى. بۇل رەتتە وتاندىق باسپاحانالارعا ايتارىم، بالالار كىتاپحاناسىن دامىتۋعا بەت بۇرۋ كەرەك. بۇل نارىقتىڭ سۇرانىسى.
ودان باسقا، كەيىنگى 5 جىلدا كىتاپحانالار قورى تەك مەملەكەتتىك تاپسىرىسپەن شىققان 4,5 ميلليوننان استام كىتاپپەن تولىقتىرىلدى. بۇل باعىتتا جۇمىستار جالعاسادى.
زامانعا ساي ەلەكتروندىق كىتاپحانانى دامىتۋ جۇمىسى قارقىن الدى. الداعى ۋاقىتتا ەلىمىزدىڭ بارلىق كىتاپحانالارى ءبىرتۇتاس اقپاراتتىق جۇيەگە قوسىلاتىن بولادى. وقىرماندار ەلىمىزدىڭ كەز-كەلگەن كىتاپحاناسىنان قاجەتتى كىتاپتى «بىرىڭعاي بيلەت» ارقىلى وقي الادى. قولداعى سمارتفون ارقىلى كەز-كەلگەن كىتاپحانامەن بايلانىس ورتاناتۋعا بولاتىن جوبالار تاعى بار.
سوندىقتان وسى يگىلىكتەردىڭ بارلىعىن ءاربىر وقىرمانىنا جەتكىزۋشىلەردىڭ ءبىرى – كىتاپحاناشىلار. سىزدەردىڭ ەڭبەكتەرىڭىز ەرەن!
بارشاڭىزدى كاسىبي مەرەكەمەن، ۇلتتىق مەرەكە – رەسپۋبليكا كۇنىمەن قۇتتىقتايمىن! سىزدەرگە زور دەنساۋلىق، وتباسىلارىڭىزعا اماندىق پەن جەمىستى جۇمىس تىلەيمىن. ەلىمىزدىڭ رۋحاني جانە زياتكەرلىك الەۋەتىن ارتتىرۋعا قوسىپ جاتقان ەڭبەكتەرىڭىز ءارى قاراي دا تابىستى بولا بەرسىن!
