ۇلتتىق تەستىلەۋ ورتالىعىنىڭ باسشىلارى پارا ءۇشىن ۇستالدى

مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ۇلتتىق تەستىلەۋ ورتالىقتىڭ ەكى باسشىسىن پارا ءۇشىن ۇستادى، دەپ حابارلايدى Sputnik قازاقستان تىلشىسى. قوعاممەن بايلانىس دەپارتمەنتىنىڭ ديرەكتورى ارمان بەرداليننىڭ ايتۋىنشا، وسى اپتادا ءبىلىم جانە عىلىم مينيسترلىگىنە قاراستى ۇلتتىق تەستىلەۋ ورتالىعىنىڭ باسشىلىعى جاساعان سىبايلاس جەمقورلىق سحەماسى اشكەرەلەندى. ماسەلەن، ورتالىقتىڭ 2016 جىلعى باسشىسى مەملەكەتتىك ساتىپ الۋلار كەزىندە جەكە مەنشىك كومپانياعا لوببي جاساعان. سول ءۇشىن 9 ميلليون تەڭگەنىڭ "تويوتا-كامري" ماركالى سۋ جاڭا اۆتوكولىگىن پارا رەتىندە العان. اۆتوكولىك تاركىلەندى. سوتقا دەيىنگى تەرگەۋ شارالارى جەدەلدەتىلگەن تۇردە جۇرگىزىلىپ جاتىر. "سونداي-اق، وسىعان ۇقساس زاڭسىز ارەكەتتەر ءۇشىن ورتالىقتى 2017 جىلدان باستاپ وسى ۋاقىتقا دەيىن باسقارعان تۇلعاعا قاتىستى سوتقا دەيىنگى تەرگەۋ امالدارى باستالدى. ول 2017-2018 جىلدار ارالىعىندا دەلدال ارقىلى جۇيەلى نەگىزدە اسا ءىرى كولەمدەردە پارا الىپ وتىرعان. سوت سانكتسياسىمەن كۇدىكتىگە قاتىستى كۇزەتپەن ۇستاۋ تۇرىندەگى بۇلتارتپاۋ شاراسى قولدانىلدى", - دەدى بەردالين ەلوردادا وتكەن ءباسپاسوز ءماسليحاتىندا. رەسمي مالىمەتكە سايكەس، سوڭعى ءۇش جىلدىڭ ىشىندە ءبىلىم سالاسىندا 620 سىبايلاس جەمقورلىق فاكتىسى انىقتالدى. ودان مەملەكەتكە كەلگەن شىعىن 1,5 ميلليارد تەڭگەنى قۇرادى. "364 تۇلعا اشكەرەلەندى. سونىڭ ىشىندە 57 مەكتەپ ديرەكتورى، 10 كوللەدج ديرەكتورى جانە 22 بالاباقشا مەڭگەرۋشىسى بار", - دەپ اتاپ كورسەتتى بەردالين.