Üş jyl būryn ortalyqtyŋ bır basşysy 9 million teŋgenıŋ "Toiota-Kamri" markaly su jaŋa avtokölıgın para retınde alǧan
Memlekettık qyzmet ısterı jäne sybailas jemqorlyqqa qarsy ıs-qimyl agenttıgı ūlttyq testıleu ortalyqtyŋ ekı basşysyn para üşın ūstady, dep habarlaidy Sputnik Qazaqstan tılşısı.
Qoǧammen bailanys departmentınıŋ direktory Arman Berdalinnıŋ aituynşa, osy aptada bılım jäne ǧylym ministrlıgıne qarasty ūlttyq testıleu ortalyǧynyŋ basşylyǧy jasaǧan sybailas jemqorlyq shemasy äşkerelendı. Mäselen, ortalyqtyŋ 2016 jylǧy basşysy memlekettık satyp alular kezınde jeke menşık kompaniiaǧa lobbi jasaǧan. Sol üşın 9 million teŋgenıŋ "Toiota-Kamri" markaly su jaŋa avtokölıgın para retınde alǧan. Avtokölık tärkılendı. Sotqa deiıngı tergeu şaralary jedeldetılgen türde jürgızılıp jatyr.
"Sondai-aq, osyǧan ūqsas zaŋsyz äreketter üşın ortalyqty 2017 jyldan bastap osy uaqytqa deiın basqarǧan tūlǧaǧa qatysty sotqa deiıngı tergeu amaldary bastaldy. Ol 2017-2018 jyldar aralyǧynda deldal arqyly jüielı negızde asa ırı kölemderde para alyp otyrǧan. Sot sanksiiasymen küdıktıge qatysty küzetpen ūstau türındegı būltartpau şarasy qoldanyldy", - dedı Berdalin elordada ötken baspasöz mäslihatynda.
Resmi mälımetke säikes, soŋǧy üş jyldyŋ ışınde bılım salasynda 620 sybailas jemqorlyq faktısı anyqtaldy. Odan memleketke kelgen şyǧyn 1,5 milliard teŋgenı qūrady.
"364 tūlǧa äşkerelendı. Sonyŋ ışınde 57 mektep direktory, 10 kolledj direktory jäne 22 balabaqşa meŋgeruşısı bar", - dep atap körsettı Berdalin.