كوستەنكو شاحتاسىندا قازا تاپقاندار سانى 16-عا جەتتى، دەپ حابارلايدى «ادىرنا» ۇلتتىق پورتالى.
«ارسەللورميتتال تەمىرتاۋ» اق مالىمەتىنشە، شاحتادا بولعان 252 ادامنىڭ 205-ءى جەر بەتىنە شىعارىلدى، ونىڭ 18-ءى مەديتسينالىق كومەككە جۇگىندى. 31 كەنشىنى ىزدەۋ جۇمىستارى ءجۇرىپ جاتىر. 16 كەنشىنىڭ ءمايىتى تابىلدى.
بارلىعى 18 كەنشى ەمدەۋ مەكەمەلەرىنە جاتقىزىلدى، بىرەۋى امبۋلاتورلىق ەمدەلۋگە شىعارىلدى، قالعاندارى اۋرۋحانادا جاتىر.
«قاراعاندىنىڭ وڭتۇستىك-شىعىسىنداعى پروفەسسور ماقاجانوۆ اتىنداعى كوپسالالى اۋرۋحانادا كومىرقىشقىل گازىنان ۋلانعان 15 ادام بار. ءبىر ناۋقاس كومىرتەگى توتىعىمەن اۋىر ۋلانعان، قالعاندارى جەڭىل جانە ورتاشا دارەجەدەگى ۋلانعان. زارداپ شەككەندەردىڭ بارلىعى توكسيكولوگيا بولىمىنە جاتقىزىلدى»، - دەپ حابارلادى دەنساۋلىق ساقتاۋ باسقارماسىنان.
سونداي-اق، تاعى ەكى ادام ميحايلوۆكاداعى پروفەسسور ماقاجانوۆ اتىنداعى كوپسالالى اۋرۋحانادا جاتىر. ءبىرىنىڭ جاعدايى اۋىر رەانيماتسيادا، ەكىنشىسى تراۆماتولوگيا بولىمىندە (وپەراتسيادان كەيىن).
ايتالىق، اپات ورنىندا قۇتقارۋشىلار جۇمىسىن جالعاستىرىپ جاتىر. شتاب جۇمىس ىستەيدى. قازىر شاحتاداعى اپاتقا بايلانىستى «ارسەلورميتتال تەمىرتاۋ»اق تجم جانە قاراعاندى وبلىسىنىڭ تج دەپارتامەنتىندە اقپاراتتىق جانە پسيحولوگيالىق قولداۋ ءۇشىن جەدەل جەلى تەلەفوندارى جۇمىس ىستەيدى.
بۇعان دەيىن قاسىم-جومارت توقاەۆ كوستەنكو اتىنداعى شاحتاداعى ءورت سالدارىنان قازا تاپقان كەنشىلەردىڭ تۋعان-تۋىستارى مەن جاقىندارىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەگەن بولاتىن. ۇكىمەتكە «ارسەلورميتتال تەمىرتاۋ» كومپانياسىمەن ىنتىماقتاستىقتى توقتاتۋ تاپسىرىلدى.
ەسكە سالايىق، 17 تامىزدا «ارسەلورميتتال تەمىرتاۋ» كومىر دەپارتامەنتىنە قاراستى «قازاقستان» شاحتاسىندا كونۆەيەر لەنتاسى ورتەنىپ، سالدارىنان بەس كەنشى قازا تاپقان بولاتىن.
«ادىرنا» ۇلتتىق پورتالى
