الماتىداعى مەكتەپتىڭ بىرىندە 62 جاستاعى كۇزەتشى وقۋشى قىزدى زورلاماق بولعان. بۇل تۋرالى استانا تەلەارناسى مالىمدەدى، دەپ حابارلايديا “ادىرنا” ۇلتتىق پورتالى.
اقپارات بويىنشا، ءبىلىم ورداسىنا كىرەبەرگەندە كۇزەتشى قىزدى كۇشپەن ۇستاپ، وزبىرلىق كورسەتكەن. ال مەكتەپ اكىمشىلىگى بۇل ءىستى جىلى جاۋىپ قويعىسى كەلگەن كورىنەدى. اتا-انالار جينالعان بەتتە ديرەكتور سىرتقى ەسىكتەن قاشىپ كەتتى دەيدى.
وقيعا الماتى قالاسى الاتاۋ اۋدانى قاراسۋ شاعىناۋدانىندا ورنالاسقان №160 ورتا مەكتەپتە بولعان. جەلىدە وقيعا تۋرالى ايتقان ايەلدىڭ ۆيدەوسى تارادى.
بۇل قالاي بولدى؟ مۇعالىم وقۋشى قىزعا قوڭىراۋ شالىپ، وعان ءبىر زات بەرەتىنىن ايتادى. الايدا قىزدى كۇتپەستەن زاتتى كۇزەتكە قالدىرىپ كەتەدى. قىز وقۋ ورنىنا كەلگەندە ماس كۇزەتشى بار ەكەن. بىزدە ونىڭ كىشكەنتاي قىزعا ءتيىسىپ، وزىنە قاراي تارتىپ، ءسۇيىپ جاتقان ۆيدەوسى بار. قۇدايعا شۇكىر، قىز ودان قاشىپ قۇتىلادى، — دەيدى اتا-انالاردىڭ ءبىرى.
قالالىق ءبىلىم باسقارماسى بۇل فاكتىگە قاتىستى شۇعىل شارالار قابىلدانعانىن ءمالىم ەتتى.
№160 ورتا مەكتەپتە قاۋىپسىزدىك قىزمەتىن كورسەتەتىن «التىن الەم گرۋپپ» كومپانياسىنا مەكتەپ اكىمشىلىگى ءتيىستى حاتتاما تولتىردى. سونىمەن قاتار، اتالعان سەرىكتەستىككە كەلىسىم-شارتتى بۇزۋ تۋرالى شاعىم مەن حابارلاما جولداندى. قازىرگى ۋاقىتتا كۇزەتشىنىڭ ۇستىنەن قىلمىستىق ءىس قوزعالدى، كۇدىكتى 15 تاۋلىككە قاماۋعا الىندى، - دەپ اتاپ ءوتتى ءبىلىم باسقارماسىنىڭ ءباسپاسوز قىزمەتى.
سونداي-اق، الماتى قالالىق پوليتسيا دەپارتامەنتى الاتاۋ اۋداندىق پوليتسيا باسقارماسىندا قر قىلمىستىق كودەكسىنىڭ 124-بابى 1-بولىگى بويىنشا قىلمىستىق ءىس تەرگەلىپ جاتقانىن حابارلادى. ساراپتاما تاعايىندالدى. جاعداي انىقتالۋدا.
