جەلىدە مەركە اۋدانى ديقاندارىنىڭ ەرەۋىلى دەگەن ۆيدەو پايدا بولدى. ونى نۇرادين راقاي ەسىمدى تارازدىق جۋرناليست Facebook جەلىسىندەگى پاراقشاسىندا جۇكتەدى، دەپ حابارلايدى «ادىرنا» ءتىلشىسى.
«مەركە اۋدانىنىڭ ديقاندارى نارازىلىققا شىعىپ، پرەزيدەنت پەن اكىمگە جانايقايلارىن جەتكىزەمىز دەيدى. ولار جامبىل وبلىسىندا قۋاڭشىلىققا بايلانىستى توتەنشە جاعداي جاريالاۋ كەرەك دەپ ەڭ ءبىرىنشى دابىل قاققان ەدى. شارۋالارعا ءبىر تيىن دا تولەنبەگەن»،—دەدى ول.
ديقاندار ۇندەۋىن جەتكىزۋ ءۇشىن ورتالىق ستاديونعا جينالعان.
«قىزىلشا ەككەن ادامداردىڭ اقشالارى بەرىلمەي جاتىر. ۇكىمەت بولگەن قارجىنى بىزگە بەرسىن. اقشامىز جوق، قينالىپ كەتتىك. قاراپايىم حالىق جىلاپ ءجۇر. ءبارىنىڭ بالا-شاعاسى بار. ماسەلەنى شەشە المايتىن بولسا، اكىم ورنىن بوساتسىن. بىزگە جۇمىس ىستەيتىن باسشى كەرەك»،—دەدى ەگىنشىلەر.
ەسكە سالايىق، شىلدە ايىندا جامبىل وبلىسىندا قانت قىزىلشاسىن ەككەن ديقاندار توتەنشە جاعداي جاريالاۋدى تالاپ ەتكەن ەدى. ولار سۋدىڭ جوقتىعىنان وسىمدىكتىڭ سابىزدەي سولىپ قالعانىن جەتكىزدى. كەيىننەن اعىن سۋدىڭ ازدىعىنان 10 مىڭ گەكتارعا ەگىلگەن قىزىلشا القابىنىڭ جارتىسى قۋراپ قالعانى بەلگىلى بولدى.
بۇعان دەيىن ۇكىمەت قانت قىزىلشاسىنىڭ ءبىر كەلىسىنە مەملەكەتتەن 25 تەڭگە سۋبسيديا تولەنەتىنىن ايتقان ەدى.
