رومان سكليار ەكىباستۇزدا جىلۋ بەرۋ ماۋسىمى قالىپتى وتەتىنىن ايتتى، دەپ حابارلايدى "ادىرنا" ءتىلشىسى.
ۆيتسە-پرەمەر رومان سكليار ەكىباستۇز جىلۋ ەلەكتر ورتالىعى تولىعىمەن رەتكە كەلتىرىلگەنىن ايتتى. ورتالىقتى رەتكە كەلتىرۋ ءۇشىن بيۋدجەتتەن 8,2 ميلليارد تەڭگە ءبولىنىپ، بەس ىستىق سۋ قازاندىعى كوممۋنالدىق مەنشىككە وتكەن.
"ونى جىلۋ ەلەكتر ورتالىعى دەپ ايتۋ قيىن. ول 2009 جىلى ەنگىزىلگەن. ءسىز جاقسى بىلەسىز، 12 مەگاۆاتت وندىرەتىن ءبىر عانا تۋربينا بار. ول بۇل ەنەرگيانى تەك ءوز تۇتىنۋىنا بەرەدى. بۇل رەنتابەلدى ەمەس نىسان. تاعى ءبىر جەو ەلەكتر ەنەرگياسىنا اقشا تاۋىپ، رەنتابەلسىز جىلۋدى تەڭەستىرە الادى. بىراق بۇل جەردە، نەگىزىنەن، ۇلكەن قازاندىق تۇر. ءبىز بارلىق 10 قازاندىقتى تالاپقا ساي جاڭعىرتتىق. بارلىق جۇمىستار اياقتالدى. 500-دەن استام ادام جۇمىس ىستەدى. ماتەريالدار الدىن الا جەتكىزىلدى. ەكىباستۇزدا بيىل جىلۋ بەرۋ ماۋسىمى قالىپتى ءوتۋى كەرەك", - دەدى رومان سكليار.
ۆيتسە-پرەمەر جىلۋ بەرۋ ماۋسىمىندا تەك ەكىباستۇزعا عانا نازار اۋدارۋ دۇرىس ەمەس ەكەنىن اتاپ ءوتتى.
"سىزدەر بىزدە پروبلەمالى ريددەر جەو ستانساسى بار ەكەنىن جاقسى بىلەسىزدەر، بىراق ونداعى ۇلەسكەرلەر ونى قالپىنا كەلتىرۋگە مۇلدەم كۇش سالعان جوق. رەسپۋبليكالىق بيۋدجەتتەن بولىنگەن قارجىنى پايدالانىپ، ونى رەتكە كەلتىرىپ، قازىر كوممۋنالدىق مەنشىككە الىپ جاتىرمىز، باسقا وڭىرلەردە پروبلەمالى جىلۋ ەلەكتر ستانتسيالارى مەن جىلۋ جەلىلەرى بار. ولارمەن ەنەرگەتيكا مينيسترلىگى مەن ۇكىمەت ماقساتتى تۇردە جۇمىس ىستەدى. قىسقا مۇنداي اۋقىمدى دايىندىق بۇرىن-سوڭدى بولماعان. كەيبىر ۇساق اپاتتار ءالى دە ورىن الۋى مۇمكىن ەكەنىن جوققا شىعارمايمىن. دەگەنمەن، ءبىز جىلۋ بەرۋ كەزەڭى ويداعىداي وتەتىنىنە سەنىمدىمىز", - دەدى ول.
وتكەن جىلدىڭ قاراشاسىندا ەكىباستۇزداعى جىلۋ ەلەكتر ورتالىعىندا اپات بولىپ، سالدارىنان 30 گرادۋس ايازدا كوپقاباتتى تۇرعىن ۇيلەر، جەكە سەكتور مەن بىرقاتار الەۋمەتتىك نىساندار جىلۋسىز قالعان بولاتىن.
