قۇرمانعازى اتىنداعى قازاق ۇلتتىق حالىق اسپاپتار وركەسترى جىل سايىن ءداستۇرلى تۇردە وتەتىن «وركەستر ءتۇنى» جوباسىن ۇيىمداستىردى. العاش رەت 2019 جىلى «وركەستر ءتۇنى: الەمدىك حيتتەر» اتاۋىمەن تۇساۋى كەسىلگەن جوبا بيىل قۇرمانعازى وركەسترىنىڭ 90 ماۋسىمى جانە 90 جىلدىق مەرەيتويى اياسىندا وتكىزىلدى. ۇلتتىق وركەستردىڭ «وركەستر ءتۇنى» جوباسى – ەلىمىزدەگى قازاق وركەسترلەرىنىڭ اراسىنداعى العاشقى جوبا.
كەشتە ونەرسۇيەر قاۋىم ءۇشىن الەمنىڭ ەڭ ۇزدىك شىعارمالارى ورىندالدى. قۇرمانعازى وركەسترى كلاسسيكالىق جانە قازاق كۇيلەرىنەن جيناقتالعان تۋىندىلاردى ورىنداۋ ارقىلى الەمدىك مادەنيەتتىڭ يگى داستۇرلەرىن ساقتاۋعا تىرىسادى.
قۇرمانعازى وركەسترىنىڭ كوپ كۇتتىرگەن «وركەستر ءتۇنى» جوباسى بيىل دا جوعارى دەڭگەيدە وتۋدە. ەكى كۇنگە سوزىلاتىن ايرىقشا كەشتە قر ەڭبەك سىڭىرگەن قايراتكەرى رۇستەم نۇرجىگىت، «الاشۇلى» توبى، «قازاقستان داۋىسى» جوباسىنىڭ قاتىسۋشىسى، كورەرمەن كوز ايىمىنا اينالعان تولعاناي پازىلاقىن جانە مادەنيەت سالاسىنىڭ ۇزدىگى اسەل الىمباەۆا، حالىقارالىق كونكۋرستاردىڭ لاۋرەاتى اجار ەركەبۇلانوۆا جانە قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتىك ۇرمەلى اسپاپتار وركەسترى ونەر كورسەتتى.
ساپالى كاسىبي مۋزىكانى حالىققا قول جەتىمدى ەتۋ ارقىلى قايتالانباس مۋزىكالىق باعدارلامالار ۇسىنۋدى باستى ماقسات تۇتاتىن قۇرمانعازى وركەسترى كورەرمەن قاۋىمعا جاڭا جوبالاردى ۇسىنۋدا. قازاق وركەسترلەرىنىڭ اراسىندا العاش رەت قۇرمانعازى وركەسترىنىڭ ۇيىمداستىرۋىمەن باستاۋ العان بۇل جوبا وسىنىڭ ايقىن ايعاعى. بۇگىنگى كونتسەرتتە ورىندالعان ءار تۋىندى – الەمدىك شىعارمالاردىڭ ىشىندەگى شوقتىعى بيىك تۋىندى دەۋگە بولادى.
«وركەستر ءتۇنى» جوباسىنىڭ ەكىنشى ءبولىمى 3 قاراشا كۇنى ساعات 21.00-دە وتەدى.
