سەيسەنبى ۇكىمەت وتىرىسىنان كەيىن ادىلەت ءمينيسترى ازامات ەسقاراەۆ جۋرناليستەردىڭ نۇرسۇلتان نازارباەۆ پەن ونىڭ وتباسىنىڭ ارتىقشىلىقتارىنا قاتىستى سۇراعىنا جاۋاپ بەردى، دەپ حابارلايدى «ادىرنا» ۇلتتىق پورتالى كۋرسيۆكە سىلتەمە جاساپ.
«قازاقستان زاڭناماسى نۇرسۇلتان نازارباەۆ پەن ونىڭ وتباسىنا بەلگىلى ءبىر ارتىقشىلىق بەرەتىن نورمالاردان تولىعىمەن تازارتىلدى دەپ ايتا الامىز با؟ – دەپ سۇرادى تىلشىلەر ادىلەت مينيسترىنەن.
«بۇل جۇمىس جالعاسىن تاۋىپ، زاڭناماعا ءتيىستى تۇزەتۋ ەنگىزىلدى. مۇنىڭ بارلىعى قاڭتار ايىندا قابىلدانعان زاڭدى جۇزەگە اسىرۋدىڭ قيسىندى جالعاسى بولدى»، – دەپ جاۋاپ بەردى ازامات ەسقاراەۆ.
باق وكىلدەرى بۇرىنعى پرەزيدەنتتە قانداي كەپىلدىكتەر ساقتالىپ قالعانىن ناقتىلادى.
«ونىڭ قول سۇعىلماۋشىلىق كەپىلدىگى بار. كولىك قىزمەتىن پايدالانۋ قۇقىعى بار. باسپاناسى بار. بۇلاردىڭ وتباسىنا قاتىسى جوق»، – دەدى ا. ەسقاراەۆ.
29 قىركۇيەكتە ورتالىق كوممۋنيكاتسيالار قىزمەتىندە وتكەن بريفينگتە تىلشىلەر «ن.نازارباەۆتى بارلىق زاڭداردان «سىزىپ تاستاۋ» ۇدەرىسى اياقتالدى ما، ەكس-پرەزيدەنتتىڭ قانداي ارتىقشىلىعى بار؟» دەپ سۇراعاندا ادىلەت ءمينيسترى جوعارىداعىداي مازمۇندا جاۋاپ بەرگەن.
«بۇل ۇردىستەر قاڭتاردا قابىلدانعان زاڭ نەگىزىندە جۇزەگە اسىپ جاتىر. ال ەكس-پرەزيدەنتتىڭ مارتەبەسىنە كەلەر بولساق،«قازاقستان رەسپۋبليكاسىنىڭ پرەزيدەنتى تۋرالى» كونستيتۋتسيالىق زاڭىمىزدا ەكس-پرەزيدەنتكە ءتيىستى كەپىلدىكتەر قاراستىرىلعان. وعان سايكەس، ەكس-پرەزيدەنت تۇرعىن ءۇي جانە كولىكپەن قامتاماسىز ەتىلۋى كەرەك. پرەزيدەنت تۋرالى كونستيتۋتسيالىق زاڭدا بۇل ناقتى كورسەتىلگەن»، – دەگەن ەدى ا.ەسقاراەۆ.
قاڭتار ايىندا پارلامەنت «قر تۇڭعىش پرەزيدەنتى – ەلباسى تۋرالى» كونستيتۋتسيالىق زاڭنىڭ كۇشi جويىلدى دەپ تانۋ تۋرالى» زاڭدى قابىلدادى. بۇل قۇجات نازارباەۆتى بىرقاتار ارتىقشىلىقتاردان، سونىڭ ىشىندە ەلباسى مارتەبەسىنەن ايىردى. كەيىن ول نازارباەۆ ۋنيۆەرسيتەتى، نازارباەۆ زياتكەرلىك مەكتەپتەرى جانە نازارباەۆ قورى سياقتى ءبىلىم بەرۋ ۇيىمدارىنىڭ جوعارى قامقورشىلىق كەڭەسىنىڭ باسشىسى مارتەبەسىن جوعالتتى.
ەسكە سالا كەتەيىك، وسىعان دەيىن ەكس-پرەزيدەنت اكتسيالارىنان, كىتاپحاناسىنان, "قۇرمەتتى سەناتور" سىندى بىرنەشە اتاعىنان ايىرىلعان بولاتىن.
«ادىرنا» ۇلتتىق پورتالى
