بيىل اۋا-رايىنىڭ جاعدايىنا بايلانىستى ەگىن بىتىك شىقپاعان. بىراق سوعان قاراماستان قازاقستاندىقتاردىڭ نانسىز قالمايتىنىنا ۇكىمەت باسشىسى ءاليحان سمايىلوۆ كەپىلدىك بەردى، دەپ حابارلايدى "ادىرنا" ۇلتتىق پورتالى كۋرسيۆكە سىلتەمە جاساپ.
«بيىل ەلىمىزدىڭ ەگىنشىلەرى ءۇشىن وتە قيىن جىل بولدى. جازدا اپتاپ ىستىق پەن قۇرعاقشىلىقتان القاپتاعى ەگىن قاتتى زارداپ شەكتى. تامىزدان باستاپ وسى كۇنگە دەيىن ۇزدىكسىز جاۋىن-شاشىن استىقتىڭ ساپاسى مەن ءتۇسىمىن تومەندەتىپ جىبەردى. قولايسىز اۋا-رايى ديحانعا دا تەحنيكاعا دا قولبايلاۋ بولدى. ەگىن وراعى ۇزاققا سوزىلىپ كەتتى. ەلەۆاتورلارعا تۇسكەن بيدايدىڭ 40%-عا جۋىعى ەشقانداي كلاسقا جاتپايدى. الايدا قازاقستاندىقتار بيىل ناننان تارىقپايدى. وتكەن جىلدان قالعان قوردى ەسكەرەتىن بولساق، جينالعان ءونىم كولەمى اىشكەى نارىقتى تولىقتاي قامستاماسىز ەتۋگە جەتكىلىكتى»، – دەدى ول.
پرەمەر-مينيستر فەرمەرلەرگە مەملەكەت تاراپىنان قاجەتتى قولداۋ شارالارى كورسەتىلگەنىن ايتتى. اتاپ ايتقاندا ءادىل ساتىپ الۋ باعاسى بەلگىلەنىپ، ايىپپۇل سانكتسيالارىن قولدانباي نەسيەلەر مەن قارىزداردى قايتارۋ مەرزىمدەرى ۇزارتىلعان. جەڭىلدەتىلگەن ديزەل وتىنى، ونىڭ ىشىندە استىقتى كەپتىرۋ ءۇشىن قاجەتتى وتىن كولەمى بولىنگەن.
«سۋبسيديالاردى تولەۋ بويىنشا مىندەتتەمەلەردى تولىق كولەمدە ورىنداۋ ءۇشىن شارالار قابىلدانىپ جاتىر. وسىلايشا وسىمدىك شارۋاشىلىعى بويىنشا العاشقى 30 ملردى تەڭگەنىڭ سۋبسيديالارى ءبولىندى. سونىمەن قاتار بيدايدى تىكەلەي ساتىپ الۋ ءۇشىن ءتيىستى قارجى ءبولۋ تۋرالى شەشىم قابىلداندى. تاعى دا اتاپ وتەيىن، ىشكى نارىقتا بيدايمەن پروبلەما بولماۋى كەرەك. ۇن جانە نان ونىمدەرى ازىق-تۇلىك كورپوراتسياسىمەن وڭىرلىك تۇراقتاندىرۋ قورلارىنداعى رەزەرۆتەر ارقىلى قامتاماسىز ەتىلگەن»، - دەدى سمايىلوۆ.
دەسە دە، وسىمدىك شارۋاشىلىعىندا كەيبىر ماڭىزدى ماسەلەلەر ءالى كۇنگە دەيىن شەشىمىن تاپپاعانىن ايتقان مينيستر جەرگىلىكتى اتقارۋشى ورگاندار زاماناۋي سۋارۋ تەحنولوگيالارىن دۇرىس ۇيىمداستىرا الماي جۇرگەنىنە توقتالدى.
«بۇل سۋ شىعىنىن ازايتىپ، ونىمدىلىكتى ارتتىرۋعا مۇمكىندىك بەرەر ەدى. ەلىمىزدىڭ قۇبىلمالى كليماتىنا بەيىمدەلگەن جەرگىلىكتى سورتتاردى وسىرۋگە ەرەكشە كوڭىل ءبولۋ كەرەك. بيدايدىڭ جاڭا سورتتارىن ءوسىرۋ جۇمىستارى ناشار جۇرۋدە. اگرارلىق عىلىمي جۇيەنى تۇبەگەيلى قايتا قاراۋ كەرەك. سونداي-اق اۋىلشارۋشالىعى تەحنيكالارى پاركىن جاڭارتۋ ماسەلەسى دە وزەكتى بولىپ قالىپ وتىر. ابدەن توزىعى جەتكەن تەحنيكا ەگىس جۇمىستارىنىڭ ساپاسىنا دا ءوزىنىڭ كەرى اسەرىن تيگىزەدى»، - دەپ اتاپ ءوتتى مينيستر.
وسىعان بايلانىستى ۇكىمەت باسشىسى اۋىلشارۋاشلىعى مينيسترلىگى مەن ءوڭىر اكىمدىكتەرىنە جينالعان ەگىندى ۋاقتىلى جانە ساپالى كەپتىرۋ جۇمىستارىنىڭ اياقتالۋىن قامتاماسىز ەتۋدى جانە استىقتى ساقتاۋ جانە وڭدەۋ، تۇقىم قورىن دايىنداۋ بويىنشا بارلىق قاجەتتى شارالاردى قابىلداۋدى تاپسىردى. ال ۇلتتىق ەكونوميكا جانە قارجى مينيسترلىگىنە فەرمەرلەردى قولداۋ ءۇشىن قاجەتتى قاراجاتتى ءبولۋدى قامتاماسىز ەتۋ ماسەلەسىن جۇكتەدى.
«اگروونەركاسىپ كەشەنىنىڭ ونىڭ ىشىندە ءداندى-داقىلداردىڭ وتاندىق سەلەكتسياسىنىڭ عىلىمي الەۋەتىن دامىتۋ جونىندە ناقتى ءىس-شارالار قابىلداۋ قاجەت. «بايتەرەك» حولدينگىمەن بىرلەسىپ اۋىل شارۋاشىلىعى تەحنيكاسى پاركىن جاڭارتۋ بويىنشا قوسىمشا ىنتالاندىرۋ شارالارىن ازىرلەۋدى تاپسىرامىن»، - دەدى پرەمەر-مينيستر.
«ادىرنا» ۇلتتىق پورتالى
