قازاقستان رەسپۋبليكاسىنىڭ پرەزيدەنتى ق. توقاەۆتىڭ «قازاقستان مەن رەسەي اراسىنداعى ىنتىماقتاستىقتىڭ تاريحى باي جانە بولاشاعى جارقىن» اتتى سۇحباتىنا قاتىستى، دەپ جازادى "ادىرنا" پورتالى.
سۇحبات بارىسىندا پرەزيدەنت ساياسي احۋالدارعا باعا بەرىپ، ىنتىماقتاستىق، سەرىكتەستىك تۇرعىسىنان وتكەن شاققا جانە كەلەشەككە كوز جۇگىرتتى.
ء"بىزدىڭ رەسەي پرەزيدەنتىمەن استانادا وتەتىن الداعى كەزدەسۋىمىزدىڭ كۇن ءتارتىبى ءداستۇرلى تۇردە وتە اۋقىمدى تاقىرىپتا بولماق. ءبىز ەكىجاقتى ساياسي، ساۋدا-ەكونوميكالىق جانە مادەني-گۋمانيتارلىق ىنتىماقتاستىق ماسەلەلەرىن جان-جاقتى تالقىلاۋدى جوسپارلاپ وتىرمىز. حالىقارالىق ۇيىمدار مەن ينتەگراتسيالىق قۇرىلىمدار اياسىنداعى ءوزارا ارەكەتتەسۋ اسپەكتىلەرىن قاراستىرايىق. قازاقستان-رەسەي ديالوگىنىڭ ماڭىزدى بەلگىلەرى سىندارلىلىق جانە ءوزارا قولايلى ناتيجەگە باعدارلانۋ بولىپ تابىلادى. ءبىز ارقاشان رەسەيلىك ارىپتەستەرىمىزدىڭ ۇستانىمىن ەسكەرۋگە تىرىسامىز، ال ولار ءبىزدىڭ پىكىرىمىزدى ەسكەرۋگە تىرىسادى" دەدى توقاەۆ رەسەيلىك جۋرناليست ساۋالىنا.
ء"بىزدىڭ ويىمىزشا، قازىرگىدەي كۇردەلى گەوساياسي جانە گەوەكونوميكالىق جاعدايدا سەنىمگە،
ءوزارا ءتيىمدى مۇددەگە، تەڭدىككە ارقا سۇيەيتىن، مادەنيەتتەردىڭ ارالۋاندىعىنا قۇرمەتپەن قارايتىن جانە قاتار دامۋعا ۇمتىلاتىن «شانحاي رۋحىنىڭ» مىزعىماس ىرگەتاسىن نىعايتۋعا باسىمدىق بەرۋ كەرەك.
بۇل رەتتە قازاقستان ءۇشىن شىۇ-عا توراعالىق ەتۋ – زور مارتەبە ءارى ۇلكەن جاۋاپكەرشىلىك. شىۇ توراعاسى رەتىندە ءبىز ۇيىمداعى ءوزارا ىقپالداستىقتى بۇدان دا جوعارى دەڭگەيگە كوتەرۋدى، ونىڭ جۇمىسىنىڭ تيىمدىلىگىن ودان ءارى ارتتىرۋدى باستى ماقسات ەتىپ قويدىق.
وسىعان وراي وڭىرلىك قاۋىپسىزدىك پەن تۇراقتىلىقتى قامتاماسىز ەتۋ، كوپجاقتى ىنتىماقتاستىقتىڭ ساۋدا-ينۆەستيتسيالىق جانە مادەني-گۋمانيتارلىق مازمۇنىن بايىتۋ قازاقستان توراعالىعىنىڭ باسىمدىقتارى رەتىندە جاريالاندى.
شانحاي ىنتىماقتاستىق ۇيىمىن ودان ءارى دامىتۋدىڭ كوپتەگەن وزەكتى ماسەلەلەرى مەن پەرسپەكتيۆالارىنا قاتىستى ەلدەرىمىزدىڭ ۇستانىمدارى سايكەس كەلەدى. بۇل – ەكىجاقتى سەرىكتەستىكتىڭ ناتيجەلى ەكەنىن بىلدىرەتىن ماڭىزدى كورسەتكىش" دەدى سۇحباتتا پرەزيدەنت.
رەداكتسيا تاڭداۋى
