پاۆلودار ءبىلىم باسقارماسى ەكىنشى سىنىپ وقۋشىسىنىڭ زورلىق-زومبىلىق قۇربانى بولۋى مۇمكىن فاكتى بويىنشا تەرگەۋ جۇرگىزىپ جاتىر، دەپ حابارلايدى "ادىرنا" پورتالى.
«بۇل دەرەك ءبىلىم باسقارماسىندا تىركەلدى. بۇل وقيعاعا بايلانىستى قىزمەتتىك تەكسەرۋ جۇرگىزىلۋدە. مەكتەپكە ءبىلىم ءبولىمىنىڭ، ءبىلىم ساپاسىن قامتاماسىز ەتۋ ءبولىمىنىڭ وكىلدەرى، ايماقتىق پوليتسيا ينسپەكتورى، كامەلەتكە تولماعانداردىڭ قۇقىعىن قورعاۋ كوميسسياسىنىڭ حاتشىسى كەلدى. بۇل ماسەلە كامەلەتكە تولماعانداردىڭ قۇقىقتارىن قورعاۋ جونىندەگى كوميسسيا وتىرىسىندا قارالاتىن بولادى»، - دەپ حابارلادى پاۆلودار ءبىلىم باسقارماسىنان.
ماقپالەەۆ اتىنداعى N4 مەكتەپتىڭ اتا-انالارى الەۋمەتتىك جەلىدە جوعارى سىنىپ وقۋشىلارىنىڭ جەتى جاسار بالانى قورلاپ، ونى ۆيدەوعا ءتۇسىرىپ العانىن حابارلادى.
بۇل ءىستى پاۆلودار وبلىسى بويىنشا بالالار قۇقىقتارى جونىندەگى ۋاكىل ناتاليا پوكيدوۆا جەكە باقىلاۋىنا الدى.
