بەينە كامەرا حرونيكاسى. جەلىدە بيشىمباەۆتىڭ قىلمىسىنا قاتىستى اقپارات تارادى

9 قاراشا كۇنى استاناداعى مەيرامحانالاردىڭ بىرىندە كەلۋشىلەر اراسىندا جانجال شىعىپ، سالدارىنان ءبىر ايەل العان جاراقاتىنان كوز جۇمعان.  ساعات 19:54-تە جەدەل مەديتسينالىق قىزمەت كورسەتۋ ستانتسياسى پۋلتىنە قوڭىراۋ تۇسكەن. جەدەل جاردەم بريگاداسى وقيعا ورنىنا جەتكەندە 1992 جىلى تۋعان ايەلدىڭ قازا بولعانىن حابارلادى. كەيىن مارقۇمنىڭ 31 جاستاعى سالتانات نۇكەنوۆا ەكەنى بەلگىلى بولدى. ول - ەكس-مينيستر قۋاندىق بيشىمباەۆتىڭ ايەلى.

ال قۋاندىق بيشىمباەۆتىڭ ۇستالعانىن 10 قاراشادا ىشكى ىستەر ءمينيسترىنىڭ ورىنباسارى سەرىك سارسەنوۆ راستاعان بولاتىن. سونىمەن قاتار باق بەتتەرىندە "استانادا ەكس-مينيستر قۋاندىق بيشىمباەۆ ۇستالعان ساتىندە ءتۇسىرىلدى" دەگەن سۋرەتتەر تارادى. ءىستىڭ ءمان-جايى تەكسەرىلىپ جاتىر. دەگەنمەن جەلى قولدانۋشىلارى الەۋمەتتىك پاراقشالارىندا تەرگەۋ اياقتالماي جاتىپ، جازبا جاريالاۋدا. جۋرناليست گۇلميرا ابىقاي Facebook پاراقشاسىندا "بەينە كامەرا حرونيكاسىن" جاريالادى:

"ق. بيشىمباەۆ اعاسىنا تەلەفون سوعىپ، تەزىرەك مەيرامحاناعا كەلۋىن وتىنگەن.

9:30 مەيرامحاناعا كەلگەن اعاسى ءبىرىنشى VIP كابينادا جارىق جانىپ تۇرعانىن كورەدى.

"ەسىكتى قاقتىم، بىراق بيشىمباەۆ كورپە الىپ كەلۋىمدى ءوتىنىپ، ىشكە كىرگىزبەدى. مەن ايتقانىن ىستەدىم، كيىم اۋىستىراتىن بولمەگە بارىپ، ەكى كورپە الىپ، ۆيپ بولمەگە كەلدىم. سول جەردە قيمىلسىز جاتقان سالتاناتتى كوردىم، ول قاتتى قورىلداپ جاتتى، ۇيىقتاپ جاتىر دەپ ويلادىم. سودان كەيىن مەن كىرەبەرىستە ەدەندە قان ىزدەرىن بايقادىم".

بيشىمباەۆ ايەلدى ءوزى اكەلگەن ەكى كورپەمەن جاۋىپ تاستاعان.

13:00 بيشىمباەۆ تەلەفون سوعىپ، تەمەكى، اسپيرين، كەتونال اكەلۋدى بۇيىرادى. زاتتاردى العان ول مەيرامحانادان بۇكىل قىزمەتكەرلەردى بوساتۋدى بۇيىردى. اعاسى بۇيرىقتى ورىنداپ، كەڭسەگە قايتادى.

13: 30 بيشىمباەۆ گاستروتسەنتردەگى بارلىق بەينەباقىلاۋلاردى ءوشىرۋدى بۇيىرادى.

13:45-تە بەينەنىڭ جويىلعانىنا كوز جەتكىزۋ ءۇشىن اعاسى باسقارۋ بولمەسىنە تۇسكەن.

ول جەدەل جاردەم شاقىرۋ كەرەك ەكەنىن ايتتى، بىراق «ول ۇيىقتاپ جاتىر» دەگەن جاۋاپ الدى. بۇل 16.35 ەدى. 16:40 بيشىمباەۆ ونى كابينەتىنە قايتا شاقىرىپ، ايەلدىڭ تامىر سوعىسىن تەكسەرۋدى سۇراعان.

اعاسى تامىر سوعىسىن تەكسەرگەننەن كەيىن عانا نۇكەنوۆانىڭ ولگەنىن ءتۇسىنىپ، تەلەفونىنان جەدەل جاردەم شاقىرعان", - دەپ جازدى.

ال Kozachkov offside Telegram پاراقشاسىندا بۇل ىسكە قاتىستى:

"قۋاندىق بيشىمباەۆ پەن سالتانات نۇكەنوۆا كونتسەرت بىتكەن سوڭ كەشكىسىن «باۋ» مەيرامحاناسىنا كەلدى.  تاڭعى 3-كە تاياپ قالعاندا مەكەمە جابىلىپ قالدى، سوندىقتان قىزمەتكەرلەردىڭ ءبىرى (باس بۋحگالتەر بولۋى مۇمكىن) ەرلى-زايىپتىلارعا تاكسي شاقىرۋدى ۇسىندى. قۋاندىق كونبەگەن. ەرلى-زايىپتىلاردىڭ اراسىندا وسى ۋاقىتتى كىشىگىرىم داۋ تۋدى. بىراق ولار تاتۋلاسقان. ولار وسىندا تۇنەپ، ىشىمدىك ىشكەن. كەيىن تاڭعى اس ءىشىپ، سالتانات قايتا ۇيىقتاۋعا كەتكەن. كەيىن بيشىمباەۆ ايەلىنىڭ دەنساۋلىعىنا الاڭداپ،  ءبىر ىنىسىنە جازىپ ءدارى-دارمەك سۇراعان.
سالتاناتقا اۋىر جاعداي بولىپ جاتقانى بەلگىلى بولعان كەزدە مەكەمە قىزمەتكەرلەرى جەدەل جاردەم شاقىرىپ، كەيىن پوليتسيا شاقىرعان. ايىرماشىلىق جارتى ساعاتقا جۋىق. ول بۇل ۋاقىتتا قايتىس بولدى", - دەگەن اقپارات تاراتىلعان.

سونداي-اق تەرگەۋ بارىسى ىشكى ىستەر مينيسترلىگى باسشىلىعىنىڭ باقىلاۋىندا. پوليتسيا جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعاندىعىن ەسكە سالدى.

ال 9 قاراشا كۇنى كوز جۇمعان مارقۇم نۇكەنوۆانىڭ دەنەسى 11 قاراشادا جەر قوينىنا تاپسىرىلدى.