كىشكەنتاي نارەستەنى ۇرىپ-سوققان ايەلدىڭ كىم ەكەنى انىقتالدى، دەپ حابارلايدى “ادىرنا” ءتىلشىسى.
بالانى ۇرىپ، داۋىس كوتەرىپ، دورەكىلىك تانىتقان ايەل تۋرالى “ادىرنا” ۇلتتىق پورتالىندا اقپارات جاريالانعان بولاتىن.
“ادىرنانىڭ” Instagram پاراقشاسىندا جۇكتەلگەن بەينە-جازباعا استانا قالاسىنىڭ پوليتسيا دەپارتامەنتى جاۋاپ قالدىردى:
“الەۋمەتتىك جەلىگە مونيتورينگ جاساۋ كەزىندە ايەلدىڭ جاس بالانى ۇرىپ-سوعىپ جاتقان ۆيدەوسى انىقتالدى. پوليتسيا قىزمەتكەرلەرى تەكسەرۋ بارىسىندا 37 جاستاعى ەلوردا تۇرعىنى انىقتالىپ، سارىارقا اۋداندىق باسقارماسىنا جەتكىزىلدى. ايەلدىڭ ايتۋىنشا، ول بۇل ۆيدەونى وتكەن جىلدىڭ جەلتوقسان ايىندا نەكەسىز كۇيەۋىمەن كەزەكتى جانجالدان كەيىن تۇسىرگەن. ايەلمەن قۇقىق بۇزۋشىلىقتىڭ الدىن الۋ جونىندە پروفيلاكتيكالىق اڭگىمە جۇرگىزىلدى. بۇل وتباسى يۋۆەنالدى پوليتسيانىڭ باقىلاۋىنا الىندى”، - دەلىنگەن حابارلامادا.
بالانى اياۋسىز ۇرىپ-سوققان كەلىنشەكتىڭ ارەكەتى جەلى قولدانۋشىلارىنىڭ اشۋىن تۋعىزدى. “بالانىڭ نە كىناسى بار؟”، “باقپاساڭ، ماعان بەرشى”، “ادامدار نە بولىپ بارا جاتىر؟”، “بالانى دەرەۋ تارتىپ الۋ كەرەك، ءبىر جەرىن جازىم قىلادى”، - دەگەن پىكىرلەر تولاسسىز تۇسۋدە.
