بيىل شەتەلدەن اۋىر جانە اسا اۋىر قىلمىس جاسادى دەپ ايىپ تاعىلعان 40 ادام ەكستراديتسيالاندى. بۇل تۋرالى بۇگىن باس پروكۋرور بەرىك اسىلوۆ مەملەكەت باسشىسىنىڭ قابىلداۋىندا ايتتى، دەپ حابارلايدى “ادىرنا” ۇلتتىق پورتالى.
بەرىك اسىلوۆ زاڭسىز يەمدەنىلگەن اكتيۆتەردى قايتارۋ ءۇشىن قابىلدانىپ جاتقان شارالار تۋرالى باياندادى. شەتەلگە شىعارىلعان اكتيۆتەردى ىزدەۋ، زاڭسىز سحەمالاردى اشكەرەلەۋ ءۇشىن جاساندى ينتەللەكتىنى پايدالانۋ ارقىلى IT تەحنولوگيالاردى قولداناتىنىن ايتتى. حالىقارالىق ىنتىماقتاستىق باعىتىندا اتقارىلعان جۇمىستاردىڭ ناتيجەسىن تانىستىردى.
اتاپ ايتقاندا، بيىل شەتەلدەن اۋىر جانە اسا اۋىر قىلمىس جاسادى دەپ ايىپ تاعىلعان 40 ادام ەكستراديتسيالاندى. جالپى قازاقستان قىلمىستىق-قۇقىقتىق سالا بويىنشا الىس شەتەلدىڭ 34 مەملەكەتىمەن 74 شارتقا قول قويىلعان، دەدى باس پروكۋرور.
ودان بولەك، ماڭىزدى ينۆەستيتسيالىق جوبالاردى قۇقىقتىق تۇرعىدان قولداۋ جۇمىستارى جونىندە اقپارات بەردى.
پروكۋرورلار 900-دەن استام ينۆەستيتسيالىق جوبانى باقىلاۋعا الدى. قازىردىڭ وزىندە 41 ينۆەستوردىڭ تۇيتكىلدى ماسەلەلەرى شەشىمىن تاپقان. ينۆەستيتسيانىڭ قاۋىپسىزدىگىنە كەپىلدى كۇشەيتۋ ءۇشىن ينۆەستيتسيالىق جوبانى جۇزەگە اسىرۋدىڭ بۇكىل پروتسەسىن ناقتى ۋاقىت رەجيمىندە باقىلاۋدا ۇستاۋعا مۇمكىندىك بەرەتىن تسيفرلىق شەشىمدەر ەنگىزۋ، سونداي-اق مەملەكەتتىك ورگانداردىڭ بيزنەسكە قاتىستى نەگىزگى شەشىمدەرىن پروكۋرورمەن كەلىسۋ ۇسىنىلعانىن جەتكىزدى.
ءۇش بۋىندى مودەل اياسىندا كاسىپكەرلەردى قىلمىستىق قۋدالاۋ 3 ەسە قىسقارعانى (614-تەن 204-كە دەيىن) جونىندە مالىمەت بەردى. جالپى، ەلىمىز بويىنشا 1041 تۇلعانىڭ نەگىزسىز قىلمىستىق قۋدالاۋعا تارتىلۋىنا جول بەرىلگەن جوق. كونستيتۋتسيالىق قۇقىق بۇزۋشىلىقتار سانى 29 پايىزعا قىسقارعان (310-نان 222-گە دەيىن).
سونىمەن قاتار، ازاپتاۋعا قارسى ءىس-قيمىل شارالارى جونىندە باياندادى. مۇنداي ارەكەتتەردىڭ الدىن الۋ ءۇشىن 54 تۇزەتۋ مەكەمەسىندە 29 مىڭ بەينەكامەرا ورناتىلعان، سايكەسىنشە ازاپتاۋ فاكتىلەرىنە شاعىمدانۋ دا 94-تەن 17-گە دەيىن ازايعان.
كەزدەسۋ سوڭىندا قاسىم-جومارت توقاەۆ ەلىمىزدىڭ تىنىس-تىرشىلىگىنە قاتىستى بارلىق سالادا زاڭنىڭ ساقتالۋىن قامتاماسىز ەتۋ ءىسىن كۇشەيتۋ قاجەت ەكەنىنە نازار اۋداردى.
