الماتىدا ءۇش كۇن بويى «تەنگريادا» قويىلىمىنىڭ تۇساۋكەسەرى بولىپ ءوتتى. حالىقارالىق "تەنگريادا" سپەكتاكل-جوباسى قازاقستان مەن كورەيا رەسپۋبليكاسى اراسىنداعى ديپلوماتيالىق قاتىناستاردىڭ 30 جىلدىعىنا جانە مادەني الماسۋ جىلىنىڭ اياقتالۋى اياسىنداعى جۇزەگە استى. سپەكتاكل حالىقارالىق جوبا بولعاندىقتان قويىلىمدا كورەيا رەسپۋبليكاسىنىڭ اكتەرلارى، رەسپۋبليكالىق كورەي تەاترىنىڭ ارتىستەرى ونەر كورسەتتى.
"تەنگريادا" سپەكتاكلى قازاقستان مەن كورەيا حالقىنىڭ مادەني قۇندىلىقتارىن بىرىكتىرىپ، ەكى ەلدىڭ بىرلەسكەن رۋحاني جانە مادەني داستۇرلەرىنىڭ دامۋىنا ىقپال ەتتى. تۋىندى كورەيانىڭ نەگىزىن قالاعان تۇلعا تانگۋننىڭ زامانىن، سول كەزدەگى ءومىر مەن ميستيكالىق جاعدايلاردى بەينەلەدى.
پوەتيكالىق سيپاتتاعى بۇل قويىلىمنىڭ تاريحى تىم تەرەڭنەن تامىر تارتادى. ويتكەنى قازاق حالقىندا «ءتاڭىرى» دەگەن ۇعىم بولسا، كورەيلەردە بۇل «تانگۋن» دەپ اتالادى. ياعني كورەي مەن قازاق دۇنيەتانىمىندا ءوزارا بايلانىستى دۇنيەلەر بارشىلىق. جالپى شىعىس حالىقتارىنىڭ رۋحاني، دۇنيەتانىمدىق بايلانىستارى، تاريحي تامىرى ءبىر ەكەنى بەلگىلى. قويىلىم وسى اۋقىمدى سالانى قامتىعان. جالپى ادامزاتقا ورتاق ىزگىلىك، ادامگەرشىلىك ادال، شىنايى ماحاببات سپەكتاكلدىڭ نەگىزگى ءتۇيىنى بولدى دەيدى،- كورەيالىق اكتەر كيم دوڭ يوڭ
"تەنگريادا " سپەكتاكلىندە رۋحتار مەن باقسىلاردىڭ بيلەرى، تايپالاردىڭ شايقاستارى، جەكپە-جەك كورىنىستەرى كورەرمەن نازارىنا ۇسىنىلدى. سوناۋ ەرتە كەزدەگى كوك ءتاڭىرى زامانىن وزەك ەتكەن قويىلىم اڭىز جەلىسى بويىنشا دايىندالدى. قويىلىم كورەرمەندەرگە ەرەكشە اسەر قالدىرىپ، ونەر سۇيەر جانداردىڭ جۇرەكتەرىنەن ورىن الدى.
«ادىرنا» ۇلتتىق پورتالى
