پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ مەملەكەت باسشىسىنىڭ تاپسىرماسىنا سايكەس زاڭسىز يەمدەنىلگەن اكتيۆتەردى قايتارۋ بويىنشا اتقارىلىپ جاتقان جۇمىستار تۋرالى «قازاقستان» ارناسىنا سۇحبات بەردى.
ۆيتسە-پرەمەر اتاپ وتكەندەي، بارلىق قايتارىلعان قاراجات ارنايى مەملەكەتتىك قوردا جيناقتالاتىن بولادى. ەگەر قايتارىلاتىن اكتيۆ مۇلىك تۇرىندە بولسا جانە مەملەكەت تاراپىنان قىزىعۋشىلىق بولسا، وندا اكتيۆ قانداي دا ءبىر مەملەكەتتىك ورگاننىڭ نەمەسە ۇلتتىق كومپانيانىڭ باسقارۋىنا بەرىلۋى مۇمكىن. ال مەملەكەت ءۇشىن ماڭىزدى ەمەس اكتيۆتەر اشىق كونكۋرس ارقىلى ساتىلىپ، ودان تۇسكەن قاراجات تا ارنايى قورعا جىبەرىلەدى. جيناقتالعان قاراجاتقا ءتيىستى باقىلاۋ جۇرگىزىلەتىن بولادى.
«قاراجات رەسپۋبليكالىق بيۋدجەت كوميسسياسىنىڭ قاراۋىنا شىعارىلىپ، سول جەردە قانداي جوبانى قارجىلاندىرۋ قاجەت ەكەنى انىقتالىپ، سودان كەيىن عانا بولىنەدى. بۇل قاراجاتقا ءتيىستى باقىلاۋ جاسالادى. بىرىنشىدەن، قارجى مينيسترلىگى كەز كەلگەن بيۋدجەت قارجىسىنا باقىلاۋ جۇرگىزۋگە قۇزىرەتتى. ەكىنشىدەن، جوعارى اۋديتورلىق پالاتا دا مەملەكەتكە كەلىپ تۇسكەن قاراجاتتى كەز كەلگەن ۋاقىتتا تەكسەرۋگە مۇمكىندىگى بار. سوندىقتان باقىلاۋ جوعارى دەڭگەيدە قامتاماسىز ەتىلەدى»، – دەپ اتاپ ءوتتى ەرۇلان جاماۋباەۆ.
پرەمەر-مينيستر ورىنباسارىنىڭ ايتۋىنشا، قايتارۋ پروتسەسى ەرىكتى جانە ءماجبۇرلى تۇردە جۇزەگە اسىرىلۋى مۇمكىن. الايدا، ەرىكتى تۇردە قايتارۋعا باسىمدىق بەرىلەدى. وسى ورايدا باستى ماقسات – قايتارىلعان قاراجاتتى ەل مۇددەسىنە جاراتۋ.
«ءبىز ءۇشىن ەڭ ماڭىزدىسى، ەگەر زاڭسىز يەمدەلگەن قاراجات نەمەسە اكتيۆ بولسا، ەرتەرەك قايتارىلىپ، اسىرەسە ەرىكتى تۇردە، ەلىمىزگە جۇمىس ىستەپ، جۇمىس ورىندارى اشىلىپ، سالىق تولەنسە – نەگىزگى ماقساتقا قول جەتكىزدىك دەپ ايتا الامىز»، – دەپ ەرۇلان جاماۋباەۆ زاڭسىز يەمدەلىنگەن اكتيۆتەردىڭ قايتارىلۋ بارىسى تۋرالى سۇحباتىن قورىتىندىلادى.
