ءماجىلىس دەپۋتاتى داۋلەت مۇقاەۆ جالدامالى پاتەر ماسەلەسىن كوتەرىپ قر ونەركاسىپ جانە قۇرىلىس ءمينيسترى قانات بيسيمبايۇلىنا ساۋال جولدادى، دەپ جازادى "ادىرنا" پورتالى.
22 قاراشا كۇنى ءماجىلىستىڭ كەزەكتى وتىرسىندا دەپۋتات داۋلەت تولەۋتايۇلى كەزەكتى رەت باسپانا تاقىرىبىن كوتەرىپ، جاستاردىڭ جالدامالى پاتەر ماسەلەسىن تالقىعا سالدى.
"استانا، الماتى شىمكەنت قالالارىندا 5 جىلعا جاستارعا جالدامالى پاتەر بەرىلگەن بولاتىن. سول بەس جىل ۋاقىت ارالىعىندا ولارعا اقشا جيناۋ مۇمكىندىگى بەرىلگەن. بىراق سول ۋاقىت پاندەمياعا ساكەس كەلىپ قالدى. ونىڭ ۇستىنە ەلدەگى جاستار ساناتى 35 جاسقا دەيىن ءوستى. كەزەكتە تۇرعان ازاماتتار كەزەكتەن شىعىپ كەتتى. قازىر سول جاستار اكىمدىكتىڭ ەسىكتەرىن توزدىرۋدا. سىزدەردىڭ تاراپتارىڭىزدان ەشكىم كەلىپ، ەشتەڭە تۇسىندىرمەدى. مىنە بەس جىل ءوتتى، سول جاستارىمىز قايدا بارادى. سول جالدامالى پاتەر باعدارلاماسىن نەگە يپوتەكالىق، ءۇي الۋ باعدارلاماسىنا الماستىرماسقا؟" دەدى ول كۋلۋاردا.
الايدا، مەملەكەت جۇمىس ىستەي الاتىن جاستارعا ەمەس، جۇمىسقا جارامسىز حالىققا كوڭىل ءبولۋى كەرەك دەپ ەسەپتەيدى ەكەن ونەركاسىپ جانە قۇرىلىس ءمينيسترى:
"بىرىنشىدەن بۇل اياققا تۇرىپ الماق نيەتتەگى جاستارعا ارنالعان باعدارلاما. ياعني سول بەس جىل ۋاقىت ارالىعىندا ولار قاراجات جيناپ ۇلگەرۋى ءتيىس. مەنىڭشە، مەملەكەت پوزيتسياسى بۇل تۇستا قاتاڭداۋ بولعانى دۇرىس. ەگەر سول پاتەردە تۇرىپ جاتقان دەنى ساۋ، مۇمكىندىگى كوپ، جاستاردى جارتىلاي جەتىم، مۇگەدەك، مۇمكىندىگى شەكتەۋلى جاندارمەن سالىستىرعاندا ءبىز الەۋمەتتىك قولداۋدى سولارعا بۇرۋىمىز قاجەت. مەملەكەت تاراپىنان پريوريتەت جاعدايى ناشارلارعا قويىلۋى ءتيىس" دەپ جاۋاپ بەردى قانات بيسيمبايۇلى.
