پاۆلودار وبلىسىنداعى جەتى جاسار ميلانانىڭ ولىمىنە وبلىس اكىمدىگىنىڭ باسشىلارى سوگىس الدى. بۇل تۋرالى پاۆلودار وبلىسىنىڭ اكىمى ەكىباستۇزدا بالالارعا قارسى قىلمىستاردىڭ الدىن الۋ بويىنشا ارنايى جينالىس وتكىزدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
بەسقاۋعا اۋىلىنداعى جەتى جاسار ميلانا داۆىدوۆامەن بولعان جان تۇرشىگەرلىك وقيعا ەشكىمدى بەي-جاي قالدىرمادى. مۇنداي جاڭالىقتاردى ەستىگەندە جۇرەگىڭ ەزىلەدى. ميعا سىيمايتىن، ادامعا مۇلدەم جات قىلىق. بۇل قايعىلى جاعدايدىڭ الدىن الۋعا بولاتىن ەدى. بەيبىت ۋاقىتتا بالالار ءسىز بەن ءبىزدىڭ كىنامىزدەن، ەرەسەكتەردىڭ كىناسىنەن قازا بولىپ جاتىر، — دەدى پاۆلودار وبلىسىنىڭ اكىمى اسايىن بايحانوۆ.
سونداي-اق، ول وتكەن جىلدىڭ اقپان ايىندا «ماۋگلي-بالالارمەن» بولعان وقيعانى ەسكە سالىپ، ودان ەشكىمنىڭ ساباق الماعانىن اتاپ ءوتتى.
ءوڭىر باسشىسى وتباسىنداعى كەلەڭسىزدىكتەردى العاشقىلاردىڭ ءبىرى بولىپ بايقايتىن مۇعالىمدەردىڭ نازارىن اۋداردى: مەكتەپتە 17 مۇعالىم مەن 51 وقۋشى بار.
ەكىباستۇزدىڭ كامەلەتكە تولماعاندار ىستەرى جونىندەگى كوميسسيا توراعاسىنىڭ ءالسىز جۇمىسى، ۋچاسكەلىك پوليتسيا قىزمەتكەرى جانە بەسقاۋعا اۋىلىنىڭ اكىمى تاراپىنان ولقىلىقتار بار.
پاۆلودار وبلىسى ءبىلىم باسقارماسىنىڭ باسشىسى سامال ايتقازينانىڭ مالىمەتىنشە، جىل باسىنان بەرى بالالارعا قاتىستى 250-گە جۋىق زاڭعا قايشى كەلەتىن فاكتىلەر انىقتالعان، ونىڭ 66-سى ەكىباستۇز قالاسىندا.
ماماندار مۇنداي جوعارى كورسەتكىشتى قورعانشىلىق ورگاندارى ماماندارىنىڭ جانە كامەلەتكە تولماعاندار ىستەرى جونىندەگى ينسپەكتورلاردىڭ جەتكىلىكسىزدىگىمەن بايلانىستىرادى.
وبلىس اكىمى وقۋ ورىندارىنداعى پروفيلاكتيكالىق قىزمەت جۇيەسىنە تالداۋ جۇرگىزىپ، تۇبەگەيلى قايتا قاراۋدى، بالالاردى زورلىق-زومبىلىقتان قورعاۋ جونىندەگى كەشەندى جوسپاردى پىسىقتاۋدى جانە تاۋەكەل ايماعىنداعى ءاربىر وتباسى ءۇشىن ۋچاسكەلىك پوليتسيا قىزمەتكەرلەرى مەن الەۋمەتتىك قىزمەتتەرگە بىرلەسكەن الەۋمەتتىك پاتروناج بەلگىلەۋدى تاپسىردى.
بۇل رەتتە ءوڭىر باسشىسى بۇل جۇمىسقا مەكتەپ پەداگوگتارىن تارتۋعا شەكتەۋ قويۋ كەرەكتىگىن اتاپ ءوتتى.
ءاربىر وسىنداي وتباسىن ارالاپ، بالالاردىڭ ءومىر ءسۇرۋ جاعدايىمەن ءبىلىم، الەۋمەتتىك قورعاۋ جانە پوليتسيا قىزمەتىنىڭ ماماندارى تانىسۋعا ءتيىس.
سونداي-اق، جەدەل كومەك بەرۋ جەلىسىنىڭ نومىرلەرىن 65-00-60, 8707-491-64-05, بالا قۇقىقتارى جونىندەگى ۋاكىلدىڭ «111» بىرىڭعاي بايلانىس ارناسىن بارلىق جەرگە تاراتۋ قاجەت.
ەكىباستۇز اكىمىنە داۆىدوۆتار وتباسىن باقىلاۋعا الۋ تاپسىرىلدى.
جينالىستا 17 قاراشا كۇنى شىدەرتى كەنتىندە قايتىس بولعان سەگىز ايلىق بالاعا قاتىستى تاعى ءبىر سۇمدىق جاعداي قارالدى. وبلىس اكىمى جاعدايدى ەگجەي-تەگجەيلى ءتۇسىنىپ، ءتيىستى شارالار قابىلداۋدى تاپسىردى.
جمنالىس قورىتىندىسى بويىنشا ءوڭىر باسشىسى لاۋازىمدى تۇلعالارعا جازا قولدانۋ تۋرالى شەشىم قابىلدادى.
الەۋمەتتىك سالانىڭ جۇمىسىنا جەتەكشىلىك ەتەتىن وبلىس اكىمىنىڭ ورىنباسارى — ايزادا قۇرمانوۆاعا، ەكىباستۇز قالاسىنىڭ اكىمى — ايان بەيسەكينگە، وبلىستىق ءبىلىم جانە الەۋمەتتىك قورعاۋ باسقارمالارىنىڭ باسشىلارى — سامال ايتقازينا مەن الميرا ديسيۋپوۆاعا سوگىس جاريالاندى.
سونداي-اق، وبلىس اكىمى كەنشىلەر قالاسىنىڭ باسشىسىنا ەكىباستۇزدىڭ لاۋازىمدى تۇلعالارىنا تارتىپتىك شارا قابىلداۋدى، ونىڭ ىشىندە قوياندى اۋىل وكرۋگىنىڭ اكىمى اباي حاكيموۆتىڭ ودان ءارى جۇمىسى تۋرالى ماسەلەنى قاراۋدى تاپسىردى.
ءوڭىر باسشىسى بارلىق قوعام، اسىرەسە، ۋاكىلەتتى مەملەكەتتىك قىزمەتشىلەر بالالاردىڭ ءومىرى مەن دەنساۋلىعىن قورعاۋى ءتيىس ەكەنىن ەسكە سالدى.
— ءاربىر وسىنداي جاعداي — بىزگە ءوڭىردىڭ، قالانىڭ، اۋىلدىڭ تىنىس-تىرشىلىگىن قامتاماسىز ەتۋدى سەنىپ تاپسىرعان تۇرعىندارىمىزعا وپاسىزدىق جاساعانمەن تەڭ ەكەندىگىن كورسەتەدى. ءبىز قانداي قوعامدا ءومىر سۇرگىمىز كەلەتىنى تۋرالى سۇراققا جاۋاپ بەرۋىمىز كەرەك. ءتىپتى، بالانىڭ ولىمىنە اكەلگەن ءبىر وقيعا — بۇل ۇلكەن قايعىلى جاعداي، ال، ولاردىڭ سوڭعى ۋاقىتتا جۇيەلى تۇردە قايتالانۋى ۇلكەن تراگەديا. بالالار — قوعامنىڭ قورعالماعان بولشەگى، ولاردىڭ دەنساۋلىعىن، قاۋىپسىزدىگىن جانە ۇيلەسىمدى دامۋىن قامتاماسىز ەتۋ — ءبىزدىڭ باستى مىندەتىمىز. مۇنى ەسكە الاتىن كەز كەلدى، — دەدى اسايىن بايحانوۆ.
ەسكە سالايىق، ميلانا 17 قاراشا كۇنى ەكىباستۇزدان 50 كم جەردەگى بەسقاۋعا اۋىلىندا جوعالىپ كەتكەن. سول كۇنى كەشكىسىن ساعات 9:00 شاماسىندا قىزدىڭ اناسى پوليتسياعا شاعىم تۇسىرگەن سوڭ، قىزدى ەكى تاۋلىك بويى 400 ادام ىزدەدى.
19 قاراشادا 7 جاسار ميلانانىڭ دەنەسى قوقىستان تابىلدى.
