بۇگىن — قازاق بالالار ادەبيەتىنىڭ نەگىزىن سالۋشىلاردىڭ ءبىرى، اقىن، جازۋشى، اۋدارماشى ساپارعالي بەگاليننىڭ تۋعان كۇنى.
كورنەكتى تۇلعا 1895 جىلى شىعىس قازاقستان وبلىسى، اباي اۋدانى، دەگەلەڭ اۋىلىندا ومىرگە كەلگەن. ول العاش اۋىل مولداسىنان حات تانىپ، 1913 جىلى سەمەي قالاسىنداعى ورىس-قازاق ۋچيليششەسىندە وقىعان. جاسىندا جىرشىلاردان تەرمە، سالت جىرلارىن، ايتىس ولەڭدەرىن جاتقا العان. سونىڭ اسەرىمەن شىعارماشىلىق جولىن ولەڭ جازۋدان باستاعان.
اقىننىڭ "قازاق قىز-بوزبالالارى" دەگەن تۇڭعىش ولەڭى 1914 جىلى "ايقاپ" جۋرنالىندا باسىلعان. "قىران كەگى" (1943) "تسيمليان تەڭىزى" (1953) "تاڭدامالى" (1956), "سىرلى قاينار" (1963) ت.ب. ولەڭدەر مەن پوەمالار جيناعى جارىق كورگەن. سونىمەن قاتار ول بالالارعا ارنالعان پروزالىق شىعارمالار، "زامانا بەلەستەرى" اتتى رومان (1975 ج) جازعان.
قالامگەر پۋشكين، لەرمونتوۆ جانە باسقا دا كوپتەگەن ورىس كلاسسيكتەرىنىڭ شىعارمالارىن قازاقشاعا اۋدارعان. جازۋشى سەكسەن سەگىز جىلدىق عۇمىرىندا جيىرما شاقتى پوەما، وننان استام پوۆەست، جۇزدەگەن اڭگىمە، كوپتەگەن ەستەلىكتەر، زەرتتەۋلەر، ماقالالار جازىپ قالدىردى.
ساپارعالي بەگالين ءوز زامانىندا قازاق حالقىنىڭ اۋىز ادەبيەتى ۇلگىلەرىن جيناپ، زەرتتەۋ سالاسىندا ۇزاق جىلدار ەڭبەك ەتكەن ەدى.
