قىتاي اۋە كومپانيالارى قازاقستان مەن قىتاي اراسىنداعى رەيستەردى ۇلعايتىپ جاتىر. بۇل تۋرالى ازاماتتىق اۆياتسيا كوميتەتىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«China Southern Airlines اۋەكومپانياسى 2024 جىلعى 23 قاڭتاردان باستاپ اپتاسىنا 3 رەيس جيىلىگىمەن الماتى – بەيجىڭ باعىتى بويىنشا رەيستەر اشۋدى جوسپارلاپ وتىر. سۇرانىس ارتسا، اۋەكومپانيا الماتى قالاسىنان ءۇرىمشى جانە سيان قالالارىنا، سونداي-اق استانا قالاسىنان ءۇرىمشى قالاسىنا 2024 جىلدىڭ كوكتەمگى-جازعى ماۋسىمىنان باستاپ قولدانىستاعى باعىتتار بويىنشا رەيستەر سانىن ۇلعايتۋ مۇمكىندىگىن قاراستىرۋعا دايىن»،—دەلىنگەن حابارلامادا.
جالپى 2024 جىلعى كوكتەم-جاز كەزەڭىندە ەكى ەل اراسىنداعى رەيستەر سانى قولدانىستاعى جانە جاڭا اۋە باعىتتارى بويىنشا اپتاسىنا 30 رەيسكە دەيىن ارتادى دەپ كۇتىلۋدە.
ەسكە سالايىق، 10 قاراشادان باستاپ قازاقستان مەن قىتاي اراسىندا ۆيزاسىز رەجيم كۇشىنە ەنگەن ەدى.
