استانالىق تۇرعىنى ناتاليا سۆيريدوۆا قازاق حالقىنا ءتىل تيگىزدى جانە ۇلتارالىق ارازدىق تۋدىردى دەپ ايىپتالىپ، ءتورت جىلعا باس بوستاندىعىنان ايىرىلدى، دەپ حابارلايدى "ادىرنا" پورتالى.
«سۆيريدەنكو (مەركۋلوۆا) ناتاليا ۆالەنتينوۆنا قىلمىستىق كودەكستىڭ 174-بابىنىڭ 1-بولىگىمەن (الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني ارازدىقتى قوزدىرۋ) قارالعان ءىس بويىنشا كىنالى دەپ تانىلىپ، وعان باس بوستاندىعىنان ايىرۋ تۇرىندەگى جازا تاعايىنداۋ تۋرالى قاۋلى شىعارىلدى. ءتورت جىل مەرزىمگە قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋ جازاسى تاعايىندالسىن»، - دەلىنگەن ەلوردانىڭ قىلمىستىق ىستەر جونىندەگى اۋدانارالىق سوتىنىڭ ۇكىمىندە.
بۇل وقيعا 7 تامىزدا بولعان.
«ساعات 01:00 شاماسىندا سۆيريدەنكو ن.ۆ. استاناداعى ۇيىندە TikTok الەۋمەتتىك جەلىسىندە «Queen 2» اككاۋنتىمەن تىكەلەي ەفير جۇرگىزدى. وسى حابار بارىسىندا سۆيريدەنكو ن.ۆ. ۇلتتىق ارازدىقتى قوزدىرۋعا جانە ازاماتتاردىڭ ۇلتتىق قادىر-قاسيەتىن قورلاۋعا باعىتتالعان قىلمىستى جوسپارلاعان. سۆيريدەنكو ن.ۆ.، ءوز جازىلۋشىلارىنىڭ اراسىندا ءارتۇرلى ۇلت وكىلدەرىنىڭ بار ەكەنىن ءتۇسىنىپ، قازاق ۇلتى وكىلدەرىنىڭ ار-نامىسى مەن قادىر-قاسيەتىن قورلاي باستاعانى قازاقستاندا كەڭ كولەمدە نارازىلىق تۋدىردى»، - دەلىنگەن سوت ۇكىمىندە.
سوت ماتەريالدارىنا سايكەس، سۆيريدەنكو ن.ۆ. قازاق حالقىنا قارسى دورەكى جانە بالاعات سوزدەر ايتىپ قانا قويماي، ولاردى پريماتتارمەن سالىستىرعان، ءبىر كورەرمەننىڭ بالالارىن جەرلەيمىن دەپ ايتقان، ولاردىڭ ءبىرىن «اۋرۋ» دەپ اتاعان. سونداي-اق ول الماتى مەن جاڭاوزەندەگى قاڭتارداعى قايعىلى وقيعاعا قازاقتاردى كىنالادى. «سونىمەن، سۆيريدەنكو ن.ۆ. وسى ماقساتتا تەلەكوممۋنيكاتسيا جەلىلەرىن پايدالانا وتىرىپ، ەتنيكالىق قاقتىعىستى قوزدىرۋعا جانە ازاماتتاردىڭ ۇلتتىق نامىسى مەن قادىر-قاسيەتىنە نۇقسان كەلتىرۋگە قاساقانا ارەكەتتەر جاساعان»، - دەلىنگەن سوتتىڭ قورىتىندىسىندا.
تيكتوكتاعى جازبانى قاراپ شىققان سوت سۆيريدەنكونىڭ مالىمدەمەلەرى «بۇكىل قازاق حالقىنا دا، قازاقستان ۇكىمەتىنە دە قارسى باعىتتالعان قورلاۋ جانە بالاعاتتايتىن سوزدەرگە، ونىڭ ىشىندە ۇياتسىز جانە بوقتىق سوزدەرگە تولى» دەگەن قورىتىندىعا كەلدى. جازبادان تىكەلەي ەفير كەزىندە سۆيريدەنكونىڭ ماس بولعانى بەلگىلى بولدى.
سوت ۇكىمىندە سۆيريدەنكونىڭ ەسى دۇرىس دەپ تانىلىپ، جاساعان ارەكەتىنە شىن جۇرەكتەن وكىنەتىنى اتاپ وتىلگەن. ۇكىم قاراشانىڭ 23-ءى كۇنى شىعارىلدى، وعان شاعىمدانۋعا بولادى.
