بۇگىن، ياعني 29 قاراشا قازاق ادەبيەتىنىڭ كلاسسيك جازۋشىسى، كوركەم ءسوزدىڭ حاس شەبەرى اتانعان عابيدەن ءمۇستافيننىڭ ومىرگە كەلگەن كۇنى.
1902 جىلدىڭ ءدال وسى كۇنىندە قاراعاندى وبلىسى تەلمان اۋدانى سارىتوبە اۋىلىندا كەيىن حالقىنىڭ زاڭعار جازۋشىسى بولار ءسابي دۇنيە ەسىگىن اشتى. شارۋا وتباسىندا وسكەن بولاشاق قالامگەر اۋىل مولداسىنان ارابشا ساۋات اشتى. 14 جاسىندا سپاسسك زاۋىتىنىڭ تابەلشىسىنەن ءبىر جىل ورىسشا وقىپ، سونداعى بەس جىلدىق ورىس-قازاق مەكتەبىنىڭ 4 سىنىبىنا تۇسەدى.
اۋىلدا ءار ءتۇرلى قىزمەتتە بولىپ، 1925 جىلى ءبىلىمىن كوتەرۋ ماقساتىمەن قىزىلورداعا كەلەدى، مۇندا وقۋعا تۇسە الماي، ولكەلىك سوتقا ءىس قاعازدارىن تىركەۋشى قىزمەتىنە ورنالاسادى. جازۋشىلىق ونەرگە قۇمارلىعى وسى كەزدەن باستالادى.
سانالى عۇمىرىن قازاق ادەبيەتىنىڭ وركەندەۋىنە، قازاق پروزاسىنىڭ كەڭ تىنىستاۋىنا ارناعان ۇلى تۇلعا ارتىنا كوپ ەڭبەك قالدىردى. ەلەۋسىز قالعان ءبىرى دە جوق. سول كەزدەگى تۇرمىس ءحالىن ارقاۋ ەتە وتىرىپ رومان سالاسىندا تاقىرىپ بايىتتى. زامانداستارىنان كوشى ىلگەرى جۇرگەن قالامگەر پروزا سالاسىنا قالامىنىڭ سياسىن اياعان جوق. سودان بولار، ونىڭ شىعارمالارى وقىرمان قولىنان تۇسپەدى. قازاقتىڭ ءبىرتۋار جازۋشىسى ءوز ەڭبەكتەرىمەن سوڭىنا ولشەۋسىز ءىز قالدىرىپ ۇلگەردى.
داڭقتى جازۋشى مۇحتار اۋەزوۆتىڭ ءوزى بۇل كىسى جايىندا، قاراعاندى رومانى جايىندا بىلاي دەپ اڭگىمەلەيدى: «جازۋشىلىق ەڭبەك پەن وعان بەرىلگەن ونەردىڭ ءار الۋان تالايى مەن تاعدىرى بار. كەيبىر تۆورچەستۆولىق تاجىريبەنى بولجاساڭ، جازۋشى وزىنە لايىقتى، شاماسى تولىق قۇلاش سەرمەپ شىعاتىن تاقىرىبىن تاپپاي جۇرەتىنى بولادى. كەڭ ومىردە كولدەي يەن، تاماشا تاقىرىپتار اراسىندا كوپ ءتۇرتىنىپ، ءونىمسىز ءجۇرىپ قالادى.
عۇلاما جازۋشىنىڭ قازاق كەڭەس ادەبيەتىن دامىتۋداعى جانە قوعامدىق قىزمەتىندەگى قول جەتكەن جەتىستىكتەرى بەلسەندىلىگى، ىسكەرلىگى ەسكەرۋسىز قالعان جوق. ول "لەنين" وردەنىمەن، "ەڭبەك قىزىل تۋ" جانە ەكىنشى دارەجەلى "ۇلى وتان سوعىسى" وردەنىمەن ماراپاتتالعان.
