"Särsen men Boqaştan" bastalǧan jol. Bügın - Ǧabiden Mūstafinnıŋ tuǧan künı

Bügın, iaǧni 29 qaraşa qazaq ädebietınıŋ klassik jazuşysy, körkem sözdıŋ has şeberı atanǧan Ǧabiden Mūstafinnıŋ ömırge kelgen künı. 1902 jyldyŋ däl osy künınde Qaraǧandy oblysy Telman audany Sarytöbe auylynda keiın halqynyŋ zaŋǧar jazuşysy bolar säbi dünie esıgın aşty. Şarua otbasynda ösken bolaşaq qalamger auyl moldasynan arabşa sauat aşty. 14 jasynda Spassk zauytynyŋ tabelşısınen bır jyl orysşa oqyp, sondaǧy bes jyldyq orys-qazaq mektebınıŋ 4 synybyna tüsedı. Auylda är türlı qyzmette bolyp, 1925 jyly bılımın köteru maqsatymen Qyzylordaǧa keledı, mūnda oquǧa tüse almai, ölkelık sotqa ıs qaǧazdaryn tırkeuşı qyzmetıne ornalasady. Jazuşylyq önerge qūmarlyǧy osy kezden bastalady. Sanaly ǧūmyryn qazaq ädebietınıŋ örkendeuıne, qazaq prozasynyŋ keŋ tynystauyna arnaǧan ūly tūlǧa artyna köp eŋbek qaldyrdy. Eleusız qalǧan bırı de joq. Sol kezdegı tūrmys halın arqau ete otyryp roman salasynda taqyryp baiytty. Zamandastarynan köşı ılgerı jürgen qalamger proza salasyna qalamynyŋ siiasyn aiaǧan joq. Sodan bolar, onyŋ şyǧarmalary oqyrman qolynan tüspedı. Qazaqtyŋ bırtuar jazuşysy öz eŋbekterımen soŋyna ölşeusız ız qaldyryp ülgerdı. Daŋqty jazuşy Mūhtar Äuezovtyŋ özı būl kısı jaiynda, Qaraǧandy romany jaiynda bylai dep äŋgımeleidı: «Jazuşylyq eŋbek pen oǧan berılgen önerdıŋ är aluan talaiy men taǧdyry bar. Keibır tvorchestvolyq täjıribenı boljasaŋ, jazuşy özıne laiyqty, şamasy tolyq qūlaş sermep şyǧatyn taqyrybyn tappai jüretını bolady. Keŋ ömırde köldei ien, tamaşa taqyryptar arasynda köp türtınıp, önımsız jürıp qalady. Ǧūlama jazuşynyŋ Qazaq keŋes ädebietın damytudaǧy jäne qoǧamdyq qyzmetındegı qol jetken jetıstıkterı belsendılıgı, ıskerlıgı eskerusız qalǧan joq. Ol "Lenin" ordenımen, "Eŋbek Qyzyl Tu" jäne ekınşı därejelı "Ūly Otan soǧysy" ordenımen marapattalǧan.