بۇگىندە ەلوردادا 3 300-دەن استام بالانى قامتيتىن 20 اۋلا كلۋبى جۇمىس ىستەيدى. ولاردىڭ جۇمىسى تۋرالى ەلوردانىڭ كوممۋنيكاتسيالار قىزمەتىندە وتكەن بريفينگتە جاستار ساياساتى ماسەلەلەرى جونىندەگى باسقارما باسشىسىنىڭ م.ا. باعدات اتىمتاي ايتىپ بەردى، دەپ حابارلايدى استانا اكىمدىگىنىڭ رەسمي سايتى.
سپيكەر اۋلا كلۋبتارىنىڭ قىزمەتى جاستار مەن جاسوسپىرىمدەر اراسىنداعى قىلمىستى ازايتۋعا، بالالاردىڭ دەنساۋلىعىن جاقسارتۋعا جانە ولاردىڭ بەلسەندىلىگىن ارتتىرۋعا تىكەلەي اسەر ەتەتىنىن اتاپ ءوتتى.
جىل سايىن اۋلا كلۋبتارىنىڭ قابىرعالارىندا حالىقتىڭ الەۋمەتتىك وسال توپتارىنان، الەۋمەتتىك از قامتىلعان وتباسىلاردان شىققان جۇزدەگەن بالا تاربيەلەنەدى.
سونداي-اق ولارعا يۋۆەنالدى پوليتسيادا ەسەپتە تۇرعان كامەلەتكە تولماعاندار دا كەلەدى.
«استاناداعى 20 كلۋبتا 7-29 جاس ارالىعىنداعى بالالار مەن جاستار اراسىنان 3300-گە جۋىق تاربيەلەنۋشى بار.
ۇيىرمەلەر مەن سەكتسيالار سانى – 130. ولار سپورت سەكتسيالارى – 74, شىعارماشىلىق باعىتتاعى ۇيىرمەلەر – 56, ونىڭ ىشىندە بوكس، كاراتە، ءتۇرلى بي ۇيىرمەلەرى، بەينەلەۋ ونەرى، باعدارلامالاۋ، تىلدەردى وقىتۋ جانە ت.ب.»، - دەدى سپيكەر.
اۋلا كلۋبتارىنىڭ تاربيەلەنۋشىلەرى بولگاريا، ارمەنيا، قىرعىزستان، وزبەكستان، رەسەي، يتاليا ەلدەرىندە، استانا، الماتى، كوكشەتاۋ، اتىراۋ، اقتاۋ، شىمكەنت، قاراعاندى قالالارىندا وتكەن بىرنەشە جارىستىڭ جۇلدەگەرى اتاندى.
«باستى ماقساتىمىز – اۋلا كلۋبتارىنىڭ سانىن كوبەيتۋ جانە ساپاسىن ارتتىرۋ. بۇل باعىتتا جۇمىس جالعاسادى»، - دەپ اتاپ ءوتتى باعدات اتىمتاي.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز