دەپۋتاتتار شايقاسى. رەسەيدەگى فەدوروۆقا قازاقستاننان ءباشىموۆ جاۋاپ بەردى

1786
Adyrna.kz Telegram
https://adyrna.kz/content/uploads/2023/11/9f4f045f-cc03-4f33-bbce-1758519caa4e.jpeg

ءماجىلىس دەپۋتاتى مارات ءباشىموۆ رەسەيلىك دەپۋتات ەۆگەني فەدوروۆتىڭ قازاقستانعا قاتىستى ايتقان پىكىرىنە جاۋاپ بەردى، دەپ حابارلايدى “ادىرنا” ۇلتتىق پورتالى.

«ارىپتەستەر، ءبىز تاعى دا مەملەكەتتىك دۋمانىڭ كەيبىر دەپۋتاتتارىنىڭ قازاقستانعا قاتىستى جاعىمسىز مالىمدەمەلەرىن كورىپ وتىرمىز. ەگەمەندىگىمىز بەن اۋماقتىق تۇتاستىعىمىز تۋرالى جالعان، ارانداتۋشىلىق مالىمدەمەلەرىمەن تانىلىپ ۇلگەرگەن دەپۋتات فەدوروۆ تاعى دا سەبەپسىز حايپ قۋىپ وتىر. بىرىنشىدەن، ول سەپاراتيزم ءۇشىن سوتتا لايىقتى جازاسىن العان «پەتروپاۆل حالىقتىق كەڭەسى» دەپ اتالاتىن جيىنعا قاتىسۋشىلاردىڭ ۇكىمىنە قاتىستى پىكىر ءبىلدىردى»، – دەدى ول. سونىمەن قاتار ءباشىموۆتىڭ سوزىنشە، رەسەيلىك دەپۋتات قازاقستاندى «تولىق قۇقىقتىق سيپاتتا ەمەس اۋماق» دەپ اتاعان. ول ەلىمىزدىڭ بارلىق قاجەتتى پروتسەدۋرانى ورىنداماي، تاۋەلسىزدىك العانىن العا ايتىپ وتىر. «13 جاسار بالا سياقتى ويلايتىن مەملەكەتتىك دۋما دەپۋتاتىنىڭ ارانداتۋشىلىقتارىنا پىكىر ايتۋ قيىن بولسا دا، مەن بار كۇشىمدى سالىپ كورەيىن. فەدوروۆتىڭ ءسوزى تاريحقا قايشى كەلەدى. ول فاكتىلەردى دورەكى تۇردە قولدانىپ، كسرو-نىڭ ىدىراۋ پروتسەسى قالاي وتكەنى تۋرالى ادەيى ءۇنسىز قالىپ وتىر. سونىمەن بىرگە فەدوروۆ ءوز پرەزيدەنتىنىڭ رەسمي ساياساتىنا قارسى شىعىپ وتىر. قازاقستانعا سوڭعى ساپارى بارىسىندا ۆلاديمير پۋتين قازاقستان-رەسەي سەرىكتەستىگى «ءوزارا قۇرمەت، ەگەمەندىكتى، اۋماقتىق تۇتاستىقتى تانۋ جانە ىشكى ىستەرگە ارالاسپاۋ قاعيداتتارىنا نەگىزدەلگەنىن» اتاپ ءوتتى»، - دەپ ءتۇسىندىردى ءماجىلىس دەپۋتاتى. مارات ءباشىموۆ رەسەيدىڭ زاڭ شىعارۋشى تارماعى وكىلدەرىنىڭ مۇنداي پىكىرلەرىن ورىنسىز دەپ ەسەپتەيتىنىن جەتكىزدى. «ولار ەڭ الدىمەن رەسەيدىڭ ءبىزدىڭ نەگىزگى جانە ستراتەگيالىق سەرىكتەسىمىز رەتىندەگى ۇستانىمىنا نۇقسان كەلتىرەدى. فەدوروۆتىڭ جانە باسقالاردىڭ بارلىق پسيحولوگيالىق جاراقاتى باق پەن پارلامەنتتە ەمەس، پسيحياتر ديۆانىندا شەشىلۋى كەرەك. ەگەمەندىك تۋرالى دەكلاراتسيا جاريالانعاننان بەرى قازاقستان بۇۇ جارعىسىن ۇستاناتىن جانە نەگىزگى حالىقارالىق ۇيىمداردىڭ مۇشەسى بولىپ تابىلاتىن كۇشتى جانە تاۋەلسىز مەملەكەت قۇردى»، - دەپ ايتتى ول ماجىلىستە. دەپۋتات اتاعانداي، ەلىمىز بارلىق كورشىسىمەن شەكاراسىن تولىعىمەن دەليميتاتسيالادى. «بىزدە كەڭەستىك وتكەنىمىز تۋرالى قۇلدىق سانا جوق، ءبىز تاۋەلسىزدىك الىپ، حالىقارالىق دەڭگەيدە تانىلدىق. مەن رەسەيلىك ارىپتەستەرىمدى مۇنداي وتە نازىك ساياسي ماسەلە جايلى ءسوز قوزعاماس بۇرىن ويلانۋعا شاقىرامىن. بۇرىنعى ورتاق كەڭەستىڭ وتكەنى تۋرالى ەستەلىكتەرىڭىز تەك تاريح كىتاپتارىندا عانا قالدى»، - دەپ ايتتى دەپۋتات مارات ءباشىموۆ.
پىكىرلەر