ول قازاقتىڭ ءبىلىمدى، ادەمى ارۋلارىنىڭ ءبىرى. ول ونەرگە دە، بىلىمگە دە وزىق دارىندى قىز.
اسەل ماراتقىزى 2002 جىلى ناۋرىز ايىنىڭ 26 جۇلدىزىندا ەلىمىزدىڭ وڭتۇستىك استاناسى اسەم الماتىدا دۇنيەگە كەلدى.
2008 جىلى مەكتەپ تابالدىرىعىن №148 مەكتەپ-گيمنازيادا اتتاپ، وقۋدا دا، ونەردە دە ءوز زامانداستارىنان وزىق بولعان اسەل التىنبەكوۆا نەبارى سەگىز جاسىندا №2 گليەر اتىنداعى مۋزىكا مەكتەبىنىڭ فورتەپيانو سىنىبىنا وقۋعا ءتۇسىپ، ەكى مەكتەپتى قاتار وقىدى.
مەكتەپ قابىرعاسىندا وقۋ، ونەر كونكۋرستارىنا قاتىسىپ، ارقاشان ۇزدىكتەردىڭ قاتارىنان كورىندى.
مۋزىكانى تەرەڭدەتىپ وقىتاتىن ءبىلىم وشاعىندا مەكتەپىشىلىك، قالالىق، حالىقارالىق كونكۋرستارعا قاتىسىپ، جۇلدەگەر اتاندى. مۋزىكالىق مەكتەپتە جەتى جىل ءبىلىم الىپ، قىزىل اتتەستاتپەن ءبىتىردى.
اسەل بي ونەرىمەن بالالىق شاعىنان اينالىسقان ورەن.
ول سپورتقا دا بەيىم بولدى. جالپى سپورتتىق بال بيلەرى كوپ ەنەرگيانى، كۇشتى، تاباندى جاتتىعۋدى قاجەت ەتەدى. بۇل بيلەر توبىن سپورتتىق بال بيلەرى دەپ اتايتىنى سوندىقتان. سپورتتىق بال بيىنەن قالالىق سايىستا ءۇشىنشى ورىن، ونەر مەكتەبىنىڭ انسامبلىمەن قاتىسقان جارىستا توپ جارىپ، ءبىرىنشى ورىن الدى.
ۇستازدارىنىڭ ءاربىر ءسوزىن مۇقيات تىڭدايتىن اسەل مەكتەپتە ۇزدىك وقۋشى بولدى. ماتەماتيكا ونىڭ ءسۇيىپ وقيتىن پاندەرىنىڭ ءبىرى ەدى. سول سەبەپتەن 9-شى سىنىپتان كەيىن رەسپۋبليكالىق فيزيكا-ماتەماتيكا مەكتەبىنە وقۋعا ءتۇسىپ، جاراتىلىستانۋ باعىتىن تەرەڭدەتىپ وقىتاتىن بۇل مەكتەپتى 2019 جىلى «التىن بەلگىگە» ءبىتىردى.
الماتىداعى حالىقارالىق اقپاراتتىق تەحنولوگيالار ۋنيۆەرسيتەتىنىڭ «بيزنەس-اناليز» ماماندىعىندا باكالاۆر ءبىلىمىن الدى.
دارىندى قازاق قىزى اسەل ماراتقىزى التىنبەكوۆا بۇگىنگى تاڭدا كاسىبىن ءبىلىم سالاسىن دامىتۋعا ارناماق نيەتتە. ءبىلىمپاز بولىپ ارقالانعان ءساتىن اسەل بىلاي ەسكە الادى: «مەكتەپ ۋاقىتىندا سىنىپ بەلسەندىسى بولاتىنمىن، 15 جاسىمنان الماتى قالاسىنىڭ ەرىكتىلەر ليگاسى (ليگا ۆولونتەروۆ) ۇيىمىنىڭ مۇشەسى بولىپ، قالاداعى 20-دان استام قوعامدىق ءىس-شارالارعا ءوز ۇلەسىمدى قوستىم.
10-11 سىنىپتاردا جاۋتىكوۆ اتىنداگى حالىقارالىق وليپيادانىڭ دا ۆولونتەرى بولدىم.
11-سىنىپتا مەكتەپ وقۋشىلار كوميتەتىنىڭ مۇشەسى بولىپ، رەسپۋبليكالىق فيزيكا-ماتەماتيكا مەكتەبىنىڭ ينتەرنات وقۋشىلارى اراسىندا «اياۋلى بالاپان» قايىرىمدىلىق، ۆولونتەرلىق كلۋبىن اشتىم. سول جىلدارى كلۋبتا ەكى قايىرىمدىلىق جارمەنكەسىن ۇيىمداستىرىپ، ءۇش رەت بالالار ۇيىنە بارىپ، ماتەريالدىق كومەك بەرىپ، كونتسەرت وتكىزدىك.
رفمم-نە تۇسۋگە كومەك بەرەتىن 6-7 سىنىپ بالالارىنا تەگىن كۋرس اشتىم. بۇل كلۋب ءالى كۇنگە دەيىن بەلسەندى جۇمىس جاسايدى»، - دەيدى.
مەكتەپ بىتىرىسىمەن 2019 جىلدىڭ جازىندا جاس كاسىپكەر TS EDUCATION وقۋ ورتالىعىن اشقان. بۇل وقۋ ورتالىعى بالالاردى فيزيكا جانە ماتەماتيكا پاندەرىنەن ءبىلىمىن كوتەرۋگە، رفمم، نزم، بيل مەكتەپتەرىنە دايىنداۋعا ارنالعان. كارانتين كەزىندە دە ونلاين جۇمىس جاسادى. قازىر الماتىداعى ۇزدىك ورتالىقتاردىڭ قاتارىندا.
اسەل ۋنيۆەرسيتەتتەگى قوعامدىق ءىس-شارالارعا قاتىسۋدى «ستۋدەنچەسكوە پراۆيتەلستۆو» ۇيىمىندا جالعاستىرعان. اسەل: «ۋنيۆەرسيتەت قابىرعاسىنىڭ 3 كۋرسىندا TESLA EDUCATION وقۋ ورتالىعىندا جوعارى سىنىپتارعا ساباق بەرە باستادىم، مۇنداعى باستى ماقساتىم: 11 سىنىپ وقۋشىلارىن ماتەماتيكا جانە ماتەماتيكالىق ساۋاتتىلىق پاندەرىنەن ۇبت-عا دايىنداۋ بولدى. سول جىلى وقىتقان 20 وقۋشىم گرانتقا ءتۇسىپ، ونىڭ بەسەۋى 130 باللدان جوعارى كورسەتكىش كورسەتتى»، - دەيدى.
وسى سەبەپتى دە اسەلدى ەلىمىزدىڭ ءبىلىم سالاسىنىڭ دامۋىنا ءوز ۇلەسىن قوسىپ كەلەدى دەپ ايتۋىمىزعا نەگىز بار دەپ ەسەپتەيمىز.
نۇرلان اسقارۇلى، جۋرناليست
