قازاقستاندىق كاسىپكەر اندرەي لاۆرەنتەۆ «ارسەلورميتتال تەمىرتاۋدىڭ» جاڭا ينۆەستورى اتاندى. وسىلايشا لاكشمي ميتتالدىڭ اكتسيالارى رەسمي تۇردە قازاقستاننىڭ قاراماعىنا ءوتتى. بۇل تۋرالى ۇكىمەتتە وتكەن بريفينگتە ونەركاسىپ جانە قۇرىلىس ءمينيسترى قانات شارلاپاەۆ ايتتى، دەپ حابارلايدى «ادىرنا» ءتىلشىسى.
«جاڭا ينۆەستور – Allur كومپانيالار توبى، اندرەي لاۆرەنتەۆ. ولارعا باسقارۋ قۇقىعى الداعى ءبىر-ەكى كۇندە كوشەدى»،—دەپ ءتۇسىندىردى مينيستر.
قانات شارلاپاەۆ كەلىسسوز كەزىندە مەملەكەت اكتيۆتەردىڭ جالپى قۇنىن 3,5 ميلليارد دوللاردان 286 ميلليون دوللارعا دەيىن تومەندەتكەنىن اتاپ ءوتتى.
ايتا كەتەيىك، «ارسەلورميتتال تەمىرتاۋدىڭ» مەنشىك قۇقىعى قازاقستانعا بەرىلەتىنى تۋرالى اقپارات كوستەنكو شاحتاسىنداعى اپاتتان كەيىن تاراعان ەدى. جاڭا ينۆەستور 46 شاحتەردىڭ ءومىرىن جالماعان اپاتقا 40 كۇن تولعاننان كەيىن جاريالاندى.
اندرەي لاۆرەنتەۆ 1979 جىلى 29 ماۋسىمدا الماتى قالاسىندا دۇنيەگە كەلگەن. "ادىلەت" جوعارى زاڭ مەكتەبىن "قۇقىقتانۋ" ماماندىعى بويىنشا بىتىرگەن. بۇگىنگى تاڭدا ول — "اگروماشحولدينگ" جشس جانە "سارىارقااۆتوپروم" جشس كىرەتىن "Allur كومپانيالار توبى" اق ديرەكتورلار كەڭەسىنىڭ توراعاسى جانە اكتسيونەرى. توپ اۆتوموبيلدەردى وندىرۋمەن جانە ساتۋمەن، سونداي-اق قازاقستان اۋماعىندا Chevrolet, KIA, JAC جانە LADA اۆتوبرەندتەرىنە سەرۆيستىك قىزمەت كورسەتۋمەن اينالىسادى.
