تاراز. قازاقپارات -تاراز قالالىق مادەنيەت ۇيىندە «ساعىم» كوركەم ءفيلمىنىڭ تۇساۋكەسەرى ءوتتى، دەپ حابارلايدى قازاقپارات. «ساعىم» تولىقمەتراجدى كوركەم ءفيلمىنىڭ العاش كورسەتىلىمىن 300-دەن اسا ادام تاماشالادى. اتالعان فيلمدە ءححى-ءشى عاسىردىڭ قاسىرەتىنە اينالىپ بارا جاتقان ءارتۇرلى ءدىني اعىمدار مەن راديكالدىق ۇيىمداردىڭ ادامدارعا تيگىزگەن زارداپتارى مەن زيانى تۋرالى جان-جاقتى سۋرەتتەلەدى. وندا سوقىر سەنىمنىڭ سالدارىنان باقىتتى وتباسىلاردىڭ شىرقى بۇزىلىپ، شاڭىراعىن ورتاسىنا تۇسكەن كەسىرلى كەساپاتى، تۋرا جولدان اداسقان ادامداردىڭ باقىتسىزدىعى بەينەلەنگەن كارتينالار تۋىندىنىڭ وزەگىنە اينالعان. «بۇل كوركەم فيلم ەلىمىزدەگى جاس جەتكىنشەك وسكەلەن ۇرپاققا ومىرلىك ساباق بولادى دەپ ويلايمىن. كينونى تاماشالاپ وتىرىپ ەرەكشە تولقىدىق. قوعامدا بولىپ جاتقان وقيعالارمەن بەتپە-بەت كەلگەندەي كۇي كەشتىك. بۇل كينونى كورگەندەر باقىت پەن باقىتسىزدىقتى، تۋرا جول مەن بۇرىس باعىتتى باعدارلاپ، بەيبىت كۇننىڭ باعاسىن باعامداي تۇسەرى ءسوزسىز»،- دەدى كينونى تاماشالاپ بولعان سوڭ ءوز اسەرىمەن بولىسكەن مادەنيەتتانۋشى الىبەك امزەەۆ. ايتا كەتەيىك، فيلم رەجيسسەرى - ەلجان جارمۇحامەدوۆ. باس رولدەردى سومداعان اكتەرلەر - رۋسلان نۇرمان، نۇرسۇلتان ماحانوۆ جانە تاعى باسقالار. «ساعىم» كوركەم ءفيلمىنىڭ تۇساۋكەسەر سالتاناتىندا وبلىستىق كينو ورتالىعىنىڭ ديرەكتورى سايلاۋ لەسباەۆ ساxنا تورىنە شىعارماشىلىق ۇجىمدى شاقىرىپ، كوپشىلىككە تانىستىرىپ، ءفيلمنىڭ ءتۇسىرىلۋ بارىسى، ماڭىزى تۋرالى اڭگىمەلەدى.
\
